【易剪義】淒酸理還亂 輕撥銀髮見血膿 藉理髮聊天解院友鬱結
即使有一顆助人的心，也需有心人的協助，易剪義髮型師16的老闆，就是看中她的孝順，不介意聘請這「高齡學徒」，讓她有改過自新的機會。而在老人院義剪時，服務對象除長期病患者外，亦包括臨終病人及被子女遺棄者，讓16感受到人情冷暖。
「老闆好重要，單憑我哋力量係唔夠」，16口中多次致謝的老闆，便是帶她入行的Wing，被問及為何會游說16加入剪髮行業，Wing拋下一句：「佢靚仔囉！把口又得。」後來透露從前為16剪頭髮時，她經常提及母親，「剪親頭髮都講阿媽，咁請個孝順嘅（員工）實冇死啦」。Wing認為應向更生人士提供改過自新的機會，故16已非他首個聘請的更生人士。
「剪親頭髮都講阿媽，咁請個孝順嘅（員工）實冇死啦。」
高齡入行 同步學洗剪 報理髮班增值自己
16轉行成為理髮學徒時，已年過三十，在行業中屬高齡，「一張白紙同識剪開嘅都係要教」，不像其他理髮學徒先學洗頭，Wing要求16先學「揸鉸剪」，除了讓她可及早達成為弱勢社群義剪的心願外，更重要的是因16年紀不小，別人可逐步學的，她必須同步學。16談及學剪髮初期，壓力極大，「老闆係傳統師傅，啲技巧一代傳一代，要領悟到好多時靠天資，我邊有咁多天資呀！」，「老闆教嗰陣講到樣樣都好簡單，但我聽唔明」，16遂在外報讀理髮班增值自己。
婆婆大讚細心 「剪到個頭好舒服」
訪問地點是在銅鑼灣一間樓上髮型屋，和煦光線從落地玻璃折射入內，髮型屋內有各種各樣的理髮儀器，又播著廣東新歌，在裝潢新潮的髮型屋內等待理髮的，都是一個個銀髮族，如此情景，實在少見。
首次接受易剪義服務的鄺太由Wing親自操刀，除基本洗剪吹外，Wing更替她噴上髮膠，設計造型。鄺太大讚髮型師服務一流，「佢哋好細心，剪到個頭好舒服」，離開前更不時照鏡，露出滿意的笑容。
一頭貼服白髮的80歲林芷芳婆婆表示，平日只在長者中心理髮，今日能到髮型屋剪髮感到開心，「師傅幾好吖，佢有問我點樣剪，我話後面剪短就得，佢又再問我前面使唔使剪，咁我話：剪吓啦」，林婆婆對易剪義的服務感到非常滿意，「安排幾好，剪咗大約20分鐘，都未計洗頭」。
「有啲長期卧床，頭髮壓到扁晒或飛開晒，甚至變成L形。」
老人院義剪感人情冷暖 「有啲冇仔女嚟探佢」
16是易剪義的「元老級」髮型師，笑言訪問當天的服務對象非常精靈，相比之前到老人院提供義剪服務，是截然不同的感覺，「喺老人院嗰啲好多病痛，好多唔舒服，甚至有啲係臨終病人，有啲冇仔女嚟探佢，感覺人情冷暖較多」，故義工需藉著剪髮來打開長者心窗，多一點關懷，透過溝通來舒緩他們心中的鬱結。
16指替老人院的長者剪髮難度較高，「有啲長期卧床，頭髮壓到扁晒或飛開晒，甚至變成L形」，他們的頭部亦容易受傷，「會剪剪吓有血、有膿」。銀白髮下藏著的複雜人生，讓義剪髮型師感同身受。16亦分享替復康人士義剪的深刻經歷，「佢哋會坐唔定，所以剪嗰陣要小心把鉸剪唔好整親佢哋」，她試過替一個不斷尖叫的復康人士理髮，16笑說會跟他「一齊嗌」，提醒大眾應放下對他們的偏見，只要理髮時跟他們說笑玩耍，便能令他們放鬆，好好剪下去。
易剪義創辦人Alex指，很多長者退休後仍想保持生活質素，「但佢哋對剪頭髮嘅認知只係單剪，年長唔等如唔可以貪靚」，希望透過易剪義服務，鼓勵他們走出社區，「想佢哋出多啲街，唔好咁隱蔽」。