九巴狀元車長轉職路線策劃 回首入行時：無想到我的小事啟發到人
2013年一個令人印象深刻的報章頭版－「狀元棄厚職轉當車長」，令全港都記住了九巴狀元車長梁領彥（Gary）的名字。
4年過去，Gary不再只是車長，同時又擔當起路線策劃的工作。兩頭燒的工作看似吃力，他卻甘之如飴；回首這幾年，自言最難忘當初的決定：「無諗到我嘅一件小事，竟然成為鼓勵其他人追夢嘅大事。」
如果人生是不停的戰鬥，Gary大概都是不願靜下來的那種人。這天來到九巴車廠，Gary才剛巧完成拍攝，匆匆趕至的他不慌不忙地換上一身車長制服，再帶一行人到巴士上接受訪問：「唔好意思啊，最近都有唔同嘅工作，所以時間有啲難就。」一如Gary所言，近期不論在社交網站，還是九巴招聘廣告都見到其身影，他聽後笑言：「我好鍾意試新嘢，有呢啲機會梗係想試吓。」
夢想成真的一剎
曾是9A狀元的Gary，在2013年解下領帶、脫下西裝，放棄了會計師樓經理一職，毅然穿上車長制服、手執軚盤，由白領褪變成藍領的經歷一躍而上報章的頭版：「其實我到依家都覺得好神奇，我嘅一個決定上咗頭版。」
追夢的故事向來動人，Gary回想夢想成真一刻仿如昨日：「我唔知點形容個感覺，就係好細個已經想做車長、一直都諗住，期待咗好耐。你諗吓，如果你唔係好鍾意一樣嘢嘅話，要你4點幾起身去返工，應該係一件好困難嘅事。」
一再延長的「工作假期」
然而，轉變有時卻會在你無想像過的時候突然出現。Gary在入職後6個月被調職至策劃及發展部，擔當起路線策劃的工作：「其實我一直都無諗太長遠，做車長一開始都當係工作假期，突然有呢個機會都始料未及，同埋通常做路線策劃都要有相關經驗，所以都好驚適應唔到。」
路線策劃究竟是什麼工作？「巴士本身有好多路線，有時唔係話想改就改，所以要同乘客、議員同政府傾，同埋都仲有要好似投標咁投一啲新嘅路線。」Gary解釋道。雖然他並無相關經驗，但憑着對路線的認識，要上手其實都不是難事。
Gary笑言，最興奮是親自策劃了「親生仔」290線：「呢條線係來往將軍澳同荃灣，個起點就喺我屋企附近，我覺得呢條線好似我親生仔，因為由最初去揀，到政府揀中我哋，再由我哋點準備開、去宣傳，一切一切都好難忘。」
不願放棄的「戰鬥」
他更為這個「親生仔」打破了自己慣常的工作模式：「我好少要求揸啲咩線，即係你派我去做咩就會做咩，但開線嗰日係我少有咁希望可以揸到頭班車，因為我真係覺得呢個係我個仔，我想同佢一齊首航咁。」
Gary又提到，現時好享受車長和路線策劃的工作：「有人問我點解你要咁辛苦，有冷氣房唔坐；點解咁辛苦走去揸車，揸車個感覺係好爽，你見到啲乘客又送佢哋去目的地，好似真係幫到佢哋咁，呢啲前線嘅經驗係幫到我做路線策劃嘅工作，你要我放棄其中一樣我都唔想。」
最重要的這些小事
縱然工作急迫，但回首工作的4年，Gary最難忘這個夢想帶給他身邊的人不一樣的人生：「有次我有個前同事同番我講，我去咗做車長之後，佢決定放棄工作去學跳舞，我完全無諗過我呢件小事會啟發到人，變成佢哋嘅大事。」
於是，他後來默默將每些工作「小事」上載到Facebook，希望可以再次促成其他人的「大事」：「我希望大家見到我啲post，無論係我嘅朋友，定係睇到share嘅人，都可以畀呢啲小事啟發到，雖然每個人要面對嘅環境都未必同，但都想鼓勵佢哋去試下做一啲佢哋想做，但又有好多掙扎、唔敢去試嘅嘢。」