【不懂撒嬌的女人．來稿】有一種同事叫「犯眾憎」

話說小明近排聽到好多同事討論緊大台套九點半電視劇。
女嘅就鍾意講賤Han有幾賤，Saving有幾正。男嘅就會講下琴晚邊個俾邊個咀咗——肉緊程度猶如自己係男女主角一樣。
雖然故事係以愛情／撒嬌為核心，但勢估唔到，大家反而覺得劇中嘅職場廝殺場面更有睇頭，更有參考價值。

文：好唔打得

何解？事緣小明公司最近嚟咗件極品。英籍女士，年約60，擁有已故女星沈殿霞嘅身形 （sorry no offence）同埋夏蕙BB嘅造型（簡直無得輸）。我地暫且叫佢做L姐吧。

其實外貌都係小事。但最厲害嘅係L姐竟然可以集齊晒劇中每位角色「好打得」嘅個性。

1. Mall姐嘅霸道

正所謂新官上任三把火。L姐為咗要表現出自己幾有領導才能，幾有威嚴，一返工就已經霸氣十足。

例如，一開波就下令佢條team所有人未來半年都唔可以放 sick leave。無錯，我係講緊「sick leave」。

同時，作為公司嘅中層／medium potato，佢竟然要求各部門主管每朝早要向佢老人家會報。最後因為冇人show佢，L姐只好發爛渣咁叫老細炒晒佢哋。Oh my god! 連老細都O晒咀！

2. 賤Han嘅語言藝術

L姐同賤Han個把口可以話係不相伯仲，所以每次開會都會道出驚為天人嘅說話。

好似有一次，佢當住個Marketing Director 面前問CEO - 點解公司冇人做Marketing嘅？我地不如開番條Marketing Team囉？

而其餘時間，L姐嘅發言從來都係離不開自己有幾醒，以前有幾風光，同埋大家應該要點尊重佢。如果唔buy佢嘅就係因為你太廢或者對佢唔夠了解。

3. Gordan哥嘅傲氣

其實Gordan哥真係幾完美。如果一定要講，佢唯一嘅缺點就係太自信，同埋喺上司面前成日郁啲意就擺大老闆個名（游生）出嚟，咩都話要直接請示游生。

係！我知你同大老闆好熟，但並不代表你可以當自己阿頭冇到。喺職場入面，越級打小報告係大忌。雖然員工手冊冇寫，但落你上司面只會令你一世冇運行。

4. 田蜜嘅美貌（係自以為）

L姐最可愛嘅地方就係覺得自己好靚，好正。

雖然大家對佢嘅感情生活一啲興趣都冇，但佢遍遍就鍾意周圍同人講自己幾多人追。好似現在喺歐洲一個高級ski resort都係佢ex為佢以命名，猶如尖沙咀 The One 一樣。

最慘係有次小明同佢出trip，L姐靜靜雞同佢講話附近有位似貌Brad Pitt嘅型男用眼神調戲緊佢 - 救命! 而呢個情況發生咗唔只一次，所以成個trip小明都唔敢對L姐有任何眼神接觸，費事好似Gordan哥咁俾人屈。

可想而知，以上嘅例子好快咁成功令L姐攀升為公司「犯眾憎」list嘅榜首，成為公司每一日最hit嘅話題。但係L姐大人物嚟㗎嘛，根本志不在此，所以琴日決定毅然急流勇退，離開公司，結束兩個多月來璀璨的「犯眾憎」生涯。

但最奇怪嘅係，當小明知道之後，佢竟然無即時開香檳慶祝。點解？雖然佢哋兩個絕對唔稱得上係朋友，但小明心知，其實L姐絕非係一個大奸大惡嘅壞人。佢認為，L姐所有嘅舉止行為都源自於佢嚴重缺乏安全感同埋自卑。所以成日要話俾人聽自己有幾好，幾叻 - 去證明自己嘅存在價值。

試諗吓，一個60歲嘅女人仲要出嚟抛頭露面／搲爛塊面，你估真係好過癮咩。

所以我成日都讚小明又靚仔，又EQ高。唔知大家同唔同意呢？

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）