【攝影師捱撞】同業發起義務頂更：善有善報

昨(6日)晚上9時許，一名28歲男婚禮攝影師陳先生，在尖東麼地道一酒店工作，當外出購置物資時，卻於酒店外被的士撞倒重傷、器材盡毀，然而涉事的士卻不顧而去。

警方仍正追緝涉事車輛及司機去向，暫未有人被捕。事發後其同業到醫院深切治療部探望，得悉傷者腦出血、手骨折，恐他長時間未能復元開工。

該名行家不但在網上尋車CAM片段，希望幫助傷者還原事件討公道；該名同業更在自己的FACEBOOK上發起義務頂更，幫助傷者度過難關。以下轉載其FACEBOOK內容：

「我地做攝影，一份好孤獨既工作，作息唔定時、收入唔穩定、手停口停，一直獨自承受各方壓力，我地為自己既夢想一直努力。可能今日大家見到陳生呢件事覺得唔關自己事,又或者覺得同佢唔係好熟而係俾個LIKE就算..... 或者我地應該係時候想下，我地會唔會用返我地自己既能力去幫助同行? 錢，可能冇。唔緊要。 但能力我地就會有，我地大家都係影野! 如果一位同行出左事，我地如果有能力的話，不如我地就當義工幫助行家『頂更』，只要付出一天既體力，人工全數或將一半以上都交返俾需要幫助既行家，我地就可以返上天賜予既能力幫助一位行家渡過難關! 我冇期望好多人可以做得到，但如果你相信只要大家團結、互相幫助，在一份睇唔到出路既工種中，尚存一份人情、一份希望。 如果你有呢份心意可以留意一下呢個POST，我會聯絡陳生，未來14日既時間，佢既更期。希望大家可以出力幫呢位行家『義務頂更』 最後祝福所有義務者,善有善報。」