幼兒功課嚇親人　N班驚現閱讀報告　校長批評：過晒火位

正當社會為小學生因操練TSA/BCA引起操練而議論紛紛，然而學習壓力已蔓延至幼稚園甚至Ｎ班。
有家長反映兒子Ｎ班的功課要做閱讀報告，K1要做剪報、並且而在班上與同學分享見聞；家長質疑，「小朋友連企都企唔穩，日常生活都未能應付，又唔識字，點做呀！」
幼稚園校長批評學校「過晒火位」，「家長應追問學校，功課安排的目的是甚麼！」

黃太：預咗打後幾十年，都要幫佢做功課

家長黃太，近日在網上討論區貼出兒子的功課，內容是K1學生要做「新聞／資訊分享」，每兩周一篇，由小朋友選出感興趣希望與人分享的題目做剪報，更有機會要在課堂分享。然而，「越級挑戰」的功課並非首次，她指Ｎ班開始已經要做圖書報告，「要幫佢寫書名、作者、出版社，講完故事問佢開唔開心，又或就自己是否喜歡相關故事，再用『心心』填色代表，但佢通常都填晒10個心！」

她指N班時收到功課已感驚訝，「預咗打後幾十年，都要幫佢做功課」，為何不轉校？黃太指，當初選擇學校，因為就近入學，而且小班教學每班20名學生，有2名老師。但未夠３歲，功課要求小朋友表達意見、分享甚至剪報，「佢點識表達吖、連凍、熱；驚、緊張；甚至表達你、我都分唔清！」唯有由家長代勞。

不交功課遭老師追問

她憶述，自己小四才要做剪報功課，而且亦只是簡單表達自己的感覺，「寫幾行字就得」，但現在「連字都未識」，「報紙寫嘅嘢，有時大人文采差啲都睇唔明啦！」她形容情況是揠苗助長，慨嘆已成大趨勢，不少朋友亦與她分享幼兒有剪報功課。她曾詢問老師為何要做相關功課，亦有試過不交功課，但反遭老師追問為何不交功課。

她坦言，面對如此情況，家長亦有責任，「父母太想子女成龍成鳳；學校因而滿足各位父母而提高對小朋友嘅要求，最終就是苦了孩子，也苦了自己。」

樂小姐的兒子在北區幼稚園就讀K1，亦要做閱讀報告。樂小姐指，兒子每日的功課相對簡單，只是畫簡單線條，但每到周末便有機會要做閱讀報告，「喺學校借書返屋企，佢哋要畫最喜愛的角色或故事場景」，由於兒子根本不可能獨力應付功課，每次只由樂小姐講故事，在說故事中途，留意兒子對不同情節或角色的反應，從而由媽媽畫出兒子「喜歡」的角色，「咁樣比較快比較方便吖嘛，佢點識講自己中意啲咩吖」。

老師要求剪報要剪有意義新聞

此外，兒子的功課亦包括剪報，樂小姐不滿學校以「親子」的旗號，但要求學生做一些不合適的功課，「讀緊幼稚園嘅人，你覺得佢可以剪咩吖」，試過剪有關聖誕節議題、迪士尼樂園、海洋公園等相對易明的資料，卻被老師指「要揀有意義的新聞！」樂小姐斥，「大人世界嘅嘢，佢明得幾多呀，暴力唔得，血腥唔得、政治時事都唔會明啦！」

幼童功課越做越難，香港非牟利幼稚園聯會主席郭楚翹無奈道：「又話遊戲中學習，點解會搞成咁？完全唔適合，無論N班、K1、K2定係K3都不適合」，她指，即使K3只適合針對大題目做功課，「例如上課時談及禽流感，提醒小朋友要注意衛生，要多洗手，讓他們明白，先可以做相關功課，如果唔係根本唔知做緊咩！」

幼稚園校長：小朋友點明大人世界呢？

她批評學校「過晒火位」。她指幼稚園、N班生，要從經驗、過程中學習，連面對不同情況有甚麼情緒或感覺都要灌輸，「媽媽帶你去公園係咪好開心呀？」、「無得去麥當勞食嘢，小朋友唔開心喎」、質疑「小朋友點會明白大人世界發嘅事呢？」她認為家長要向學校反映意見，亦要追問校方，類似功課目的係為咩「老師答唔到要問主任、校長！」

郭楚翹指，K1要做功課，只可以做用貼紙貼圖的功課，下學期才可以有簡單線條，訓練手部肌肉發展；按課程指引，K2才可以寫簡單的字詞。