【武術01】香港幾時先可以有光劍比賽呀？

話說《星戰》新三部今年就會迎黎終章，係時候同大家講下一個我一直都好想參加嘅比賽。

就係光劍格鬥比賽！唔講咁多，去片先：

搞呢個比賽嘅組織叫LudoSport International，佢哋亦有整自己比賽用嘅光劍。無錯，成件事係十分傻，同時又十分青春嘅。其實，又有邊個睇過星戰嘅人，會無幻想過自己用光劍同人格鬥呢？一世人，就係應該搵機會做下呢種事。話晒都係運動，總好過成日坐係到睇電視唔郁卦？

講返條片，可以見到落常轉轉下先斬，係會輸俾正正常常用劍嘅人。不過，你玩得光劍，好心你都轉返兩個劍花先啦！比著我，玩光劍一定舞來舞去，贏輸其次，最緊要型。

你睇返佢哋官網，仲寫埋有七種劍型，即係唔同打法，右面仲有數值表：力量呀、防守呀、速度呀、不可預測度呀、仲有需要嘅體能，件事真係十分之打機，十分之中二病。但係大家要知，首先，呢七個劍型（戰鬥形式），星戰入面係有嘅，唔係佢哋自己作；第二，其實都幾型幾開心丫，正所謂人不中二枉少年嘛。

（維基百科：中二病是源自日本的網路流行語，泛指一種自我認知心態，用以形容一些經常自以為是地活在自己世界或做出自我滿足的特別言行（多數處於青春期）的人，青春期特有的價值觀的總稱。）

而佢哋並唔係唯一玩呢種運動嘅團體，Golden Gate Knights、The Saber Authority、New York Jedi、Terra Prime Lightsaber Academy都係呢幾年興起玩光劍格鬥嘅團體。 雖然我已經唔再係少年，但其實都仲有顆年青嘅心。香港有嘅我一定會參加。

盲人武術

最後講兩句《俠盜一號》，唔想spoiler，只講下甄子丹。

當赤手空拳打十個又試過，唔畀用腳打外國人又試過，拳王泰臣都打埋，當大家煩緊下集葉問喺地球已經無晒對手，仲可以打咩嘅時候，甄子丹就喺宇宙另一角落打緊白兵。

戲中佢做一位盲嘅武者，喺大家都用激光槍嘅時候用枝棍（其實係杖）打人。本來個角色唔係盲嘅，係甄子丹覺得盲嘅話更合乎劇情需要，結果就變成大家睇到嘅樣。

可能一望盲嘅武術家就會諗起《盲俠座頭市》，但其實現實中，亦有好多視障人士去學武術。最為人熟知就一定係殘疾人奧林匹克運動會入面有嘅盲人柔道比賽（唔一定要全盲，視障人士都可參加）。

香港都有呢方面嘅運動員：「盲佬」自白：因為柔道，我才走出盲人圈子！

上網睇返，不同武術都有視障人士參加。學武術可以有好多理由，為搏擊、為嗜好、為健康、為型，全部都係好理由。同時，天下武術／運動如此多，總有一個岩你。

今次係咁多！

（本文純屬作者意見，不代表香港01立場。）