【宣誓風波】胡國興籲勿有權用盡　批梁振英無做好溝通橋樑

全國人大常委會將會就宣誓風波釋法，新一屆特首參選人退休法官胡國興出席電台節目時表示，釋法時機不恰當，「觀感唔好睇」，認為「有權亦不宜用盡」，香港人會「安樂啲」。胡又批評特首梁振英在事件中，並無做好橋樑角色。對於人大主動在法庭判案前釋法，胡指香港法官相當堅定，根據他們所理解的法律判案，形容「呢樣嘢係唔怕，一啲都唔使懷疑」。

對於人大就《基本法》104條釋法，胡指釋法並無追溯力，估計中央亦可能因此選擇在法庭裁決前釋法。胡稱不清楚釋法具體內容，故亦不知道釋法空間有多大，認為「而家咁樣評論係不合實際，亦唔公道」。人大因宣誓事件主動釋法，責任誰屬？胡稱「無事件就無官司，無官司就無釋法」，但強調「無睇話責任屬於邊個」，至於青年新政兩名候任立法會議員是否需要為此事負責，胡稱因案件進入司法階段，故他不會評論。

胡國興又指，若由他出任特首，有責任成為橋樑將港人及中央意見交替轉達，批評梁振英並無做好此橋樑。胡稱「做特首應該講畀中央政府聽，（宣誓事件）呢個唔係衝突，係兩地文化有唔同，由得佢講，完全唔需要憂慮」，將香港的言論自由向中央闡釋。

對於有指人大釋法有利梁振英連任下屆特首，胡國興稱「其實好難知道」，認為此為政治權衡，「都係測度，有啲可能啦」。