傳媒老總惜別劉慧卿爆黑幕 當年叫「情急」記者搵橡筋紮住先
連任7屆立法會（連同回歸前的「立法局」、回歸後「臨時立法會」除外）議員的民主黨主席劉慧卿，將於本周五（30日）正式告別議會生涯。她今日（26日）舉行惜別午宴，延開8席宴請傳媒，廣播處處長梁家榮、有線高層趙應春、自由黨首屆主席李鵬飛等資深傳媒人均畀面到場，席間大爆劉慧卿30年前任職記者的「黑幕」，卿姐則即場教路指，「做記者就要好似狗咁，咬住啲問題唔放！」
曾被同事改名「艾曼紐」
劉慧卿在1991年參加立法局直選前，任職記者超過15年，更曾擔任香港記者協會主席。趙應春透露，卿姐於1978年加入無綫電視新聞部時，曾經掀起新聞部一場小騷動，「聽聞有個叫Emily Lau的『美少女』返工，我哋覺得好老土，將佢改做『艾曼紐（法國情色電影女主角）』，個個男同事血氣方剛、奔走相告，卿姐日日著唔同款嘅吊帶裙返工，一手打電話，一手翹頭髮，呢個影像40年後我都無法磨滅！」
趙應春續指，卿姐後來升任採訪主任，有次上水發生車禍，卿姐透過無線電查詢誰人可以前往事發地點，但同事都「蛇王」不敢回應，只有身處香港仔的趙應春應機，結果卿姐叫他馬上趕往上水，趙以「我好急尿，要去廁所先」敷衍應對，結果卿姐著他「搵條橡筋紮住先」，「我哋個個都聽到O晒嘴。」
卿姐訪問中途曾「拉隊走」
梁家榮則笑指趙應春「講嘅嘢接近二級半」，而他和趙應春同期認識劉慧卿，形容卿姐是「記者的典範」，指「佢問政時對啲官唔客氣，其實做記者已經係咁，試過有次專訪房屋司，做做下竟然拉隊走人，搞到我哋同事以後接觸房屋司時都增加咗少少難度」，梁又讚卿姐的強悍是「40年如一日」。
另一資深傳媒人羅燦發言時提到，卿姐一直未有透露不願重返無綫工作的原因，卿姐馬上搶咪回應指，「我唔返無綫係因為無綫太刻薄」，鄰座的趙應春隨即說笑道：「係咪？我聽講你人工好高......」卿姐立即反駁稱：「人工高你個頭呀......」惹得全場哈哈大笑。談及在無綫工作的點滴，劉慧卿叫數名現任無綫的記者上台，笑著質問他們無綫是否有黑名單，吳璟儁則笑指，「你上一代恩怨，唔好搞下一代......我係被壓榨的低層，無黑同白名單。」
劉慧卿形容自己25年的議會生涯是光輝歲月，即使離開都一定後會有期，她未來數天將會落區派發從政25年的工作報告，而卸任後第一日就會和一名自小學已經相識的密友把臂同遊越南。