轉戰金融界　莊偉忠續敢言：梁天琦被拒參選「完全唔合理」

過去於一田百貨任職八年的莊偉忠，以「不開會」、「不捽數」的管理模式聞名，更教人刮目相看的是，他在一田百貨經歷零售寒冬，卻公然與業界唱反調，不贊成開放自由行，更標榜不做黃金週推廣、不用簡體字，堅決「唔吼自由行生意」，被視為最人性化的CEO之一。
時至今日，莊偉忠轉職於內地有業務的康宏，他即席以「行動」回應繼續月旦時事不「慎言」，直斥政府拒絕梁天琦參選「完全唔合理」，又指《信報》突然終止練乙錚專欄的做法「唔啱」。

向以敢言見稱的莊偉忠，今午(3日)以新身份與傳媒茶敍時，被問到對近日多宗政治事件有何看法，包括《信報》突煞停練乙錚專欄、梁天琦被拒參選立法會，以及財爺曾俊華有意參選特首等事，莊偉忠絕無「欺場」遂一回應。

評練乙錚專欄被停刊

莊偉忠直言不同意《信報》做法，「我好鍾意、好鍾意練乙錚先生，我同意林行止先生所講，佢服務咗《信報》25年，一個電郵或好短時間就叫練乙錚停筆，我認為，唔啱。可唔可以有一個更好做法？我認為，可以。事到如今，已變成閂埋門嘅事，我作為讀者，希望練先生可以任何形式繼續保持佢嘅創作量。如果有一日，《晴報》send個電郵咁同我講，我諗我會好唔高興，希望晴報唔會咁對我。」

對於如何看待特首梁振英連任勝算，莊偉忠續說，「政治上的發展我地無從判斷，因為無能力，所以點解我地需要練乙錚先生，練乙錚有能力在過程中睇得通通透透，遠比莊偉忠好。」

評梁天琦被拒參選立會

對於梁天琦被拒參選事件，莊偉忠直言「完全唔合理」，「香港係個成熟地方，應有權選擇，如果無市場就無市場，唔應該在門檻一刀切。最大問題係，我哋睇唔倒rules and regulations上有好清晰。我哋追求講道理，道理就係你俾個清晰guideline我，而家無的情況下純粹是個人決定，唔係我哋過往值得驕傲、程序上的公義。」他坦言，自己不是十分緊貼事態發展，但期望可以透過法治解決事件，「梁天琦會提選舉呈請，我不知道程序，但肯定有一班人會透過法律手段，合法程序去challenge（挑戰），公道點說我也希望有結論，一樣嘢唔知點、唔知點，係最無癮，我地希望有個了斷。如果我地仍然相信法治精神，雙方就用佢地認為合適的法律程序去clarify （澄清）。」

評財爺有意選特首

莊偉忠曾公開讚賞財爺曾俊華為人處事，對於曾俊華近日突表態有意參選特首選舉，莊亦不諱言繼續力撐，「在眾多官員中，財爺我未聽過他說難聽的話；曹星如，或香港隊，或劍擊手，財爺都有適當地表達尊重。」他又指，自己永遠記得，從電視上得悉單車好手黃金寶取得世界冠軍時，自己感動得在車廂上哭出來，「好感動、好激勵人心。我年輕時是個運動員，好知道運動對人，事業、家庭、社會的重要性，唔係今日『無貢獻』嗰樣嘢。」這個說法，似是回應梁振英於2014年指，體育界沒經濟貢獻的言論。

評內地市場發展空間

過去反對刻意迎合內地自由行市場，莊偉忠轉戰金融界後，亦保持一貫立場，「我反對任何人做生意時，專登為迎合某一類人而扭曲自己。打開門口就要做生意，佢入嚟我咪做囉。喺過程上，我哋唔會覺得，簡體字就係事件的分野，十一國慶、黃金週我哋完全唔做，我哋仍然堅持用廣東話、繁體字，好相信我哋嘅客人懂嘅。」他又笑言自己不諳國語，舊日工作時無意返回內地發展，但康宏已有業務在內地則不同，「香港係國際城市，如果本業上做得到，點解唔做？只係業務上做到邊個地埗，老實講我唔知。現實地，公司有業務在內地，服務嚟嘅，點解唔做？」