【車主留意．車場陷阱】田灣停車場陰招處處　落斜設減速壆靠害

不少停車場都會設置減速壆，目的是令車輛車速減慢，以保障路人安全。日前香港仔田灣停車場內，新建的減速壆，就令不少車主叫苦連天，皆因減速壆位處斜路末端，車輛行經時，極易撞倒車前方底部（俗稱頭唇），不少車輛路過時，都要打醒十二分精神。

家住田灣邨的Gian Lam，每日都需要駕車出入田灣邨停車場，日前發現停車場由一樓通往地下的斜路底部，新安裝一條減速壆。「早兩日都未見有，我諗裝咗一兩日，最慘係個位置太陰濕，喺正斜路尾，因為落斜時，車前方底部已經好貼地，再加上條壆都幾高，今日就有架七人車，行過嘅時候刮到。」

新油漆易跌車

據Gian Lam 向《香港01》表示，「陰濕」減速壆只是停車場其中一樣奇怪措施，「早前停車場管理處，將成個停車場地下重新油過，但唔係用防滑漆油，當地下一有水就非常滑，油完第二日，已經有兩架電單車，因為地下太滑而跌倒。」而且新油漆只用了個多月，已經開始變黑，「感覺仲污糟過以前。」

分層收費混亂

另外，田灣停車場連收費都與別不同，過去一直只設固定位及浮動位收費，但今個月開始竟再增加一項「分層收費」，即在不同層數泊車，收費亦會有所不同，令車主們非常混淆。「以前只分固定位同浮動位，新收費就變咗分層，底層最貴，愈高就愈平，我本身泊開浮動位，咁我想租返浮動位啦，但浮動位唔同層數又唔同價錢。我泊開4樓B，諗住可以俾返4樓B價錢啦，點知佢話原來當年申請車位嘅時候，已經編咗個車位俾你，所以又編咗我去貴啲嘅3樓，重點就係你又叫浮動位，又俾咗個固定位人，咁即係點呢。」

《香港01》向田灣停車場管理處方面查詢，管理處發言人陳先生回覆表示，新減速壆是昨日（3日）完成了其中一層的安裝，隨後已接獲4名車主反映，車輛因減速壆位置過高而刮到，所以其他層數暫時停工，等研究清楚及改良後，才再安裝。

不過，陳先生則表示，暫未有收到因油漆而引起意外的報告，至於收費方面，則是停車場業主佛山順聯集團的商業決定。