【走塑．走膠袋】型到核爆！港媽去街市用膠箱買魚撐環保　

颱風山竹對香港造成極大破壞，海浪把多年累積的垃圾沖上岸，早前更有義工拾到22年前的膠水樽。塑膠對環境的污染人人知，但又有多少人能夠身體力行？不過，近日就有一位母親改變多年生活習慣，改用可重複使用的膠箱買餸。

「因為自己做好唔夠，要影響人。」鄭小姐一直關注環保議題，為了減塑開始半吃素，她表示平常也有向家人灌輸環保概念，希望他們源頭減廢。「平日一得閒就喺屋企Whatsapp group分享有關膠嘅禍害、分解時間同污染新聞等資訊，每次返屋企見到好多膠袋就嚴肅地講一講。」她的母親本來不注重環保，但前幾天買餸時諗起鄭小姐又可能會苦口婆心地說一輪，於是經過家品店就乾脆買膠箱作買餸長用。

有不少環保人士都表示，開始減塑的難度是要面對別人的臉色，特別是商家會抱怨，因他們習慣用塑膠袋。鄭小姐的母親表示在屯門新墟街市用膠箱買餸的過程基本上順利，除了有其中一檔起初沒聽到照給膠袋，及後得悉不想要膠袋後，抱怨一兩句最後也有配合，將餸菜放入箱。鄭小姐指母親現在開始欣賞用膠箱：「媽媽話發現一次都慳到5-6個膠袋，覺得很好，因為買魚嘅膠袋難洗，唔可以再用，好浪費，所以以後都會繼續用個箱。」