【登革熱】市民如常到獅子山散步、行山：習慣被蚊咬　捽吓就無嘢

本港連日來確診多宗本地登革熱個案，政府上周五（17日）宣布暫時關閉相信是源頭的黃大仙獅子山公園一個月，食環署今日更到有確診患者居住的竹園北邨滅蚊。然而，獅子山附近的行山徑，今日仍有不少散步人士及行山人進出，有市民表示，「我哋唔驚，習慣被蚊咬，痕痕下捽下就無嘢」。

記者今日再到獅子山公園視察，雖然公園已被封，但仍有不少附近居民及行山客經過公園旁的登山徑散步。每逢周末會到公園散步的呂先生表示，「我哋唔驚，習慣被蚊咬，痕痕下捽下就無嘢！」他又指，日常主要到公園內散步及休息，知道有登革熱爆發，因此一坐下，會點蚊香軀蚊及擦蚊怕水。

市民：公園一帶蚊患嚴重　政府後知後覺

他明言，過去十多年公園一帶蚊患嚴重，近日才見有政府人員勤於滅蚊，形容是後知後覺，而自己居住於附近的翠竹花園經常被蚊咬，但只是痕癢，未試過帶嚴重情況，如在公園被咬只是用清水沖一沖，減輕痕癢徵狀。

行山客：到到都有蚊，驚就唔駛嚟

於獅子山落山的行山客何先生則表示，「度度都有蚊，驚就唔駛嚟（獅子山）」，自己今早與友人於石梨貝水塘，他稱平時行山如「企定定」一定會被蚊咬，山上每逢雨天過後，更會湧現蚊潮，但不太擔心會被蚊咬。他會身穿淺色衫、長褲及戴帽子行山，如有需要會擦蚊怕水。