禁司機食煙講粗口 推「一人專車服務」 紅Van出招抗衡巴士港鐵
近年港鐵及巴士不斷開發新線路以及延長營業時間，導致紅Van生意慘淡，有部分車主更寧願「斷供」小巴。
年屆64歲的葉先生（March）廿年前開創銅鑼灣糖街至荃灣麗城花園（銅荃）小巴路線，為了「自救」對抗市道，以嶄新模式經營，要求旗下司機提供高質素服務，禁止司機「食煙講粗口」及提供「一人專車服務」，讓乘客將小巴「私有化」；March更常以「我的驕傲」總結多年來辛苦打拼得來的銅荃路線。
開紅Van線前要交反黑組
March揸紅Van二十年，是銅鑼灣至荃灣麗城花園（簡稱「銅荃」）紅Van路線的「站主」，整條線由他二十年前一手一腳開創而成。March憶述：「1998年果時住荃灣麗城，周圍都好荒蕪，無小巴可以過海，最遠都只係由麗城去到佐敦道，所以我就諗可唔可以搵幾部小巴揸過海」。萬事起頭難，開創紅Van路線有潛規則，不是一般人可以輕易達成，成功與否視乎你的江湖背景與輩分。「當時開路線嘅都係有份量嘅人，想開線就要先寫出路線圖，睇下有無同其他小巴有抵觸，再拎上去反黑組，主管批左就可以。」
曾做過警隊督察7年
March能夠成為站主，全憑年輕時擔任過7年警隊督察，留下不少人脈關係。小巴線「獲批」後，March找來數輛小巴，膽粗粗試着營運。「最初試下由麗城駛往上環信德中心，17蚊一程，點知生意好好，由最初守住盤生意，演變至後來有司機想比錢加入我條線。」
紅Van有獨特的行規及秩序，當中的入線費更是行內不明文規定，要數萬元至數十萬元不等。惟駕駛March開創的銅荃路線不僅可以免卻入線費，更以義字當頭，「揸我條線，司機每日需付200元管理費，我會提供小巴及對講機，並保證他們每日有『五鋪』（即由站頭開出可行駛5次），扣除車租、管理費及燃油費後，他們每日收入逾800元，收入已算是不錯；另外我條線奉行共產主義，如果有司機不幸食『牛肉乾』被罰款450元，當日有返工的司機就要一齊夾20元，其餘款項就由涉事司機自己負擔，爆胎情況一樣。」
不需付入線費，遇突發情況又有其他司機一起分擔，聽起來待遇似是不錯，惟行內有傳銅荃路線「惡頂」，全因要遵守「另類」規矩，嚇退不少司機。「你想入我條線，一蚊唔比都無問題；但入得我條線就唔準食煙、講粗口，對客仲要有禮貌。」
銅荃路線有另類規矩 對抗紅Van慘淡市道
大部分香港市民對紅Van或許只流於「爛仔、沒有規矩或惡勢力操控」的負面印象，惟March依然渴望把自己的路線，打造成行內的一股清泉，「巴士不斷開闢新路線、地鐵營運時間延長，直接衝擊紅Van生意，整個行業的生意額大不如前，唯有係服務層面不斷提升，禁止司機食煙講粗口。」
除以上招數，銅荃線更提供「一人專車服務」，乘客只需致電熱線，司機便會開車接載，由荃灣駛往銅鑼灣，車費依舊23元，並無趁機加價。March解釋，站頭位於銅鑼灣，駛至荃灣目的地後，司機正常都是空車而回，「所以空車不如接埋個客，仲可以賺埋10元紅隧隧道費，所以我成日同啲司機講，要好好珍惜客人，要對客好啲，客人落車提醒下佢地，小心唔好漏低野，到站時派下卡片，請佢地下次打黎call車。」
未載滿客照開 差價由March補貼
另一方面，March指出「司機要等齊客先開車」亦是小巴由盛變衰的催化劑，為了不讓惡性循環蔓延至銅荃路線，身為「站主」的March以獨有方式抗衡，「在我站頭，司機即使未載滿客都規定20分鐘內開出，中間的差價由我補貼。舉例來說，倘車上只有一個客，剩下15個座位的車費，我會自掏荷包補貼司機。」
儘管March使出渾身解數，紅Van生意始終今非昔比，連同入行的人數也不斷下降，出現青黃不接的現象。「唯有去考牌的地方，見到有人考左牌，就派卡片邀請佢入行揸小巴囉。」
百物騰貴、生活艱難，小巴司機為了糊口，不惜開快車冀「兜多幾轉」，促成「亡命小巴」。March認為是人之常情，惟保證揸紅Van的司機都有一定的駕駛技術，「紅Van司機知道邊個位適合加速或減速。」
霎眼間，March經營了銅荃路線20年，親眼見證著紅Van界的興衰。他不禁慨嘆，四方八面的衝擊導致紅Van的生意難做，惟銅荃路線是他一手開創，視之為「親生仔」，即使踏入退休年齡仍不言倦，冀望「做得幾耐得幾耐」。March形容銅荃路線為「我的驕傲」，除因一手一腳創立，更讓他體會到街坊街里的人情味，「最近收到一封請帖，個位小姐由細個開始搭我車，到而家已經結婚，呢啲情誼先係最珍貴，係錢都買唔到。」