【門都甩埋】西營盤回收箱背後勁恐怖　社區人士：大半年都係咁　

垃圾桶或回收箱若「客滿」而無人清理，情況就不堪設想。就好像西營盤站C出口一個垃圾及廢物回收箱，箱內外前後都放滿垃圾，部分更散落到後方花槽，單睇相已覺得噁心。不過當區區議員卻跟《香港01》表示，他們未收過有關投訴......

從西營盤「不是垃圾站」參與者之一的Leo提供的相片中所見，西營盤港鐵站C出口外一個垃圾及廢物回收箱內外都放滿可回收及不可回收的垃圾，如飲品膠樽、膠袋、紙巾、雨傘等等，更有不少跌到後面東邊街的花槽，衛生情況相當惡劣。回收箱的四道門有三道不翼而飛，而收集塑膠回收筒的門已被垃圾卡住不能關上，LEO指此情況應該已有大半年。

「嗰個回收箱對面附近係我哋開站嘅位置，經常都見到唔同類型的垃圾堆滿回收箱內外。塞喺箱背嗰啲垃圾，應該係啲人將垃圾就咁擺係箱上面，之後滑落去箱後面，再跌落下層嘅花槽。」Leo向《香港01》說。

如此恐怖的回收箱，何解堆積多時無人清理？《香港01》致電當區區議員李志恒辦公室查詢，職員竟指從未收到有關投訴，區內較少收到垃圾堆積的問題。「通常啲市民嚟投訴我哋都會即刻做，打電話去政府部門處理。可能有時夜晚居民掉垃圾唔啱時候，或者硬要堆積去某一個位，我哋未必可以咁快處理得到。」

食環署回覆指，現時港鐵西營盤站C出口外(般咸道)的「垃圾/廢物回收箱」的可循環再造物料收集次數為每星期五次，而「垃圾/廢物回收箱」內的廢屑箱則每日清理至少六次。此外，該署人員在日常巡查街道時，如發現回收箱滿溢時，會即時要求可循環再造物料收集承辦商於指定時間內作出清理。