【熱到似火爐】爆熱40度　香港仔街市幾時裝冷氣？

夏日熱辣辣，走入香港仔街市，滿心以為有瓦遮頭可以抖下涼，但為何會愈行愈熱？皆因街市自1983年落成啟用，經過整整35年，通風系統已變得非常殘舊，街市內動輒錄得近40度高溫。地區人士直指，街市商戶十多年來一直要求加裝冷氣，卻久沒結果。炎夏期間高溫難耐，加上貨物容易變壞，街市生意可謂每況愈下。

今年財政預算案提出預留20億港元，在未來10年推行街市現代化計劃，可是多區的街市安裝冷氣計劃，仍是未見進展。「熱到成個蒸籠咁，平時入去行一個圈，唔使幾分鐘已經成身汗。」香港仔社區幹事黃銳熺指，大部分南區居民都會到香港仔街市購物，但每到夏天，街市內的翳焗程度實在難以忍受，即使商戶自行在店舖加裝風扇，仍是無濟於事。

「街市入面仲熱過出面，商戶同客人都好難頂！」黃表示，街市商戶常向他大呻，每逢夏季他們的生意額會大幅下降，惟十多年來，因為同意街市安裝冷氣的門檻實在太高(需取得8成5商戶同意)，難以令商戶達成共識，幸經過多番協調，現時同意的商戶已超過8成。他希望計劃可以盡快開展，以解商戶和居民之窘。