港版羅拉細個是肥妹　嚴父勒令要操fit　教導做人凡事要三思

數張在運貨時爆肌拉貨的相片，在網上瘋傳一輪，令朱芊佩（小珠）被網民封為「港版羅拉」，其身形線條完美得令人羨慕，「功臣」原來是父親。「屋企人都偏肥，細個我係肥妹仔，佢話肥唔健康，要我操fit啲，如果嗰陣唔做運動，大個可能真係成個波咁。」
不論在搬運區、送貨點，小珠遇人總會禮貌微笑、打招呼，受到旁人紛紛稱讚。眼前的小珠，剛中帶柔、直率開朗、堅強獨立，與她成長之路中，與父親的嚴厲和愛分不開。

曾於運貨期間，被網民拍下爆肌拉貨的「港版羅拉」，消聲匿跡約一年，近日終掀開廬山真面目，接受《香港01》專訪。報道一出，大批網民紛紛留言大讚小珠「又靚、又型」、「好啱做健身教練」，亦有人指曾親眼見過小珠運貨，直言其「好有禮貌、做嘢好認真。」

中五畢業後，小珠獨自留港工作、生活，經歷過職場的爾虞我詐，承擔起家庭經濟支柱，箇中酸甜苦辣只有她自知，但她挺過來了，因為她有一位嚴格睿智的爸爸。

自小被當男生教　要做掌上壓

小珠是家中長女，卻從小被當男生般教養，與妹妹的待遇截然不同，「細個被老豆逼做掌上壓，佢當我仔咁，教我就好嚴格，教阿妹就寬鬆啲，好唔同嘅方法。」小珠靜靜地續說：「體罰、打鬧，冇禮貌就會當眾打，唔畀面，譬如食飯坐底唔叫人、周圍走，就會當眾兜巴星。」

說起爸爸，小珠很自然收起平時的笑容，微微皺起眉頭深思：「老豆教過我好多嘢，好多好有用。」她頓了頓，再說：「做人謙虛啲，佢成日同我講槍打出頭鳥，做人唔好咁高調，同埋要知足、感恩、珍惜身邊人。」這時，小珠彷彿又在理順爸爸的「金句」，「同埋尊重別人，人地先會尊重我，以和為貴，個人有禮貌啲，行去邊都會好行啲，咁哩個係真嘅。」正當記者想追問，小珠又緩緩吐出一句：「同埋寬容啲，個人大方啲。」總結起來，嚴父諄諄訓誡至少十條。

做人謙虛啲，佢成日同我講槍打出頭鳥，做人唔好咁高調，同埋要知足、感恩、珍惜身邊人。

凡事三思　免情緒影響判斷

小珠銘記父親的教誨，凡事要三思，「當我同人就嚟有衝突、或激動，就叫自己唔好出聲。試過趕時間拉貨，前邊有人行埋嚟，仲要慢慢行，正常都想鬧佢，但再睇清楚啲，原來係阿婆，我即刻㩒停板貨，等佢過先。」

電影《打死不離三父女》中，摔跤女兒吉塔在比賽苦戰中，想起嚴父的說話：「父親不可能永遠陪在你身邊，有些時候你需要自己獨自應戰。」小珠的爸爸也經常訓練她體能，「教我堅強、獨立。做掌上壓、雙腳綁重物跑步，跑很多個圈。長大後不需要依賴父母，可以自己生存，並幫到自己家人。」做事獨立果斷之餘，小珠閒時也喜歡獨處，「試過自己搭巴士去赤柱睇風景，跟住搭天星小輪睇海，又去沙灘。」

11歲時仍baby fat　父勒令要做運動

現時小珠看來身材十分標準，不過，小珠透露了操練原因，「11、12歲嗰陣，我係肥妹仔，佢話肥唔健康，要我操fit啲。雖然係baby fat個種，唔係肥成波咁，不過如果嗰陣唔做運動，大個可能就真係成個波咁，因為屋企人都偏肥。」

隨着歲月和人生磨練增加，小珠逐漸明白爸爸從小的教誨，正如周杰倫所唱的《聽媽媽的話》：「為什麼要聽媽媽的話，長大後你就會開始懂了這段話」。