【梁家鬧機場】九巴「抽水」開特辦快線　網民憂續牌前景

特首梁振英的「行李門」事件已演變成商業機構的抽水對象。九巴今日於其facebook專頁發帖附上「一男子」漫畫剪影，宣傳來往烏溪沙至沙田的「特辦快線 」86P，瞬間被網民瘋傳，笑言「上車向司機講叫我梁特首，即享半價」，亦有人關注九巴續牌前景：「到續牌時只要唔係689應該無事，如果係689一男子因素你就諗定後路都得 。」

九巴於facebook預告，將於下周一（4月25日）推出來往馬鞍山泥涌及沙田的「特辦快線」，廣告指「瞓晏咗？留低嘢要折返家攞？有九巴全新特辦86P特快線，一程車特快由烏溪沙出沙田站，追番啲失去咗嘅時間！ 」，廣告中「一男子」剪影用筆邊指邊說道：「夠哂鐘啦！仲唔同我特快特辦！」令人聯想到近日鬧得熱哄哄的梁振英「行李門」事件。

廣告推出短短兩個小時，便獲得超過三百個「讚好」，不少網民都稱讚九巴廣告有創意：「又抽乾城門河」、「上車向司機講叫我梁特首，即享半價」、「九巴終於記得幫自己大老闆郭炳江報仇」（新地前聯席主席郭炳江等人，被裁定串謀前政務司長許仕仁收受巨款，郭被判囚5年）；不過也有網民為九巴擔憂：「唔怕被政府唔續牌？ 」