【守護老狗】領養鬆獅犬　遭反咬傷入院　主人不離不棄背後有苦衷

兩被領養鬆獅犬不易信人

2016年，漁農自然護理署捕獲1,919隻流浪狗、接收1,003隻由主人交出的狗隻，透過其他途徑接收343隻狗隻，當中只有637隻被主人領回，513隻幸運兒獲領養。儘管如此，每年仍有數以千計的主人以各種理由棄養他們的「家人」。瑜珈導師Greta早年在動物伴我行會社狗隻收容中心（CAF）當義工，目前分別9歲及6歲半的鬆獅犬Butkus（阿拔）及Francois（阿飯）也是從CAF領養回來，鬆獅狗樣子可愛，惟阿拔與阿飯過去種種經歷，令牠們不易信人，動輒以咬人來表達不滿情緒，主人Greta亦曾中招。

無考慮年紀品種　「同我哋相處得舒服就OK」

誰不想寵物長命百歲？大部分人選擇在狗隻孩童時期開始飼養，Greta把Butkus和Francois帶回家時，兩犬已成年，「佢哋都係好可愛，只係size大咗，小動物嘅心唔會隨住年紀而轉變，都係好童真，同小朋友一樣」，她強調領養時沒有考慮狗隻的年紀或品種，「佢哋覺得同我哋相處得舒服就OK」。

聖誕夜拉窗簾遭噬咬　需全身麻醉洗傷口

「佢兩個畀咗我好多第一次」，Greta先後在動物伴我行會社狗隻收容中心（CAF）先領養當時已3歲的鬆獅犬Butkus及Francois，CAF已告知她兩犬的行為問題，如Butkus對陌生人較抗拒，Francois則不喜歡與其他狗隻相處，需寄養在獨立房間，故Greta用了約一年時間做足準備工夫，包括常在CAF當義工，才把兩犬帶入家庭。

儘管如此，與兩隻鬆獅犬的相處時絕不輕鬆，Butkus常因瑣事咬傷主人Greta，「佢咬得比較多，但最傷嗰啲全部係阿飯咬」，Greta展示左手肘上一個長達三厘米的傷痕，2015年聖誕夜，Francois在陽台上歇息，當Greta上前拉合窗簾時，竟被Francois不動聲色一口咬下，低頭一望只見手肘鮮血直湧，由於傷口太大，Greta需接受全身麻醉來清洗傷口和縫針，並留院兩日。

心痛愛犬被遺棄經歷　「唔信人好正常」

出院後，Greta坦言亦需時調節情緒面對Francois，可是，身痛的Greta，心更痛，「我會諗，到底佢之前經歷咗啲咩，先會搞到依家咁？」她表示，一般而言，若狗隻不喜歡人類某些行為，會以低鳴或露齒表達不滿，若對方無視警號，才會進一步攻擊，Francois卻從不發出警號，直接咬人，「可能之前嘅經歷教曉咗佢，唔使wu（低鳴）啦，唔使露齒啦，因為都冇用嘅，直接咬，威脅先會終止」。

曾被綁在樹上遺棄

Greta透露，阿飯小時候被遺棄多次，「其中一次被人綁喺樹上，當時仲要係7月」，被帶到CAF後，牠躲在枱底拒絕進食，「唔信人好正常，好似人失戀咗幾次，都冇咁易投入一段新感情一樣」，故她不容許阿飯再有不愉快經歷，「我覺得commit咗呢件事（養狗），我就commit到底架喇」。

狗隻生老病死乃必經階段　斥棄養者自私

屢次被咬，卻從未想過棄養，「咬到我入廠，其實大條道理拎番去CAF話唔養啦，但如果我閂咗佢哋度門，佢哋度門可能永遠閘到終老」。Greta認為，都市人太易獲得物質享受，漸漸不懂得珍惜。常說需把寵物當家人，能做到的又有幾個？當狗隻健康、外貌或個性不乎主人預期時，不少人便會以各種藉口棄養，她直斥棄養者自私，「阿爸阿媽湊你都好辛苦，有冇遺棄過你？你嘅問題（棄養）係完咗，但係佢（狗隻）仲喺度忍受緊」。她奉勸希望養寵物的人必須考慮清楚，並做好各方面的準備工夫才開始飼養，「生老病死係每個生命嘅必經階段，如果你哋未ready，唔好養，我寧願佢哋（狗隻）喺收容所，你都唔好帶佢哋番屋企，因為你唔配」。

為愛犬堅持到底的，還有CAF的新負責人Constance。「佢條脷凸出嚟，個樣成隻ET仔咁，都係唔靚仔架喇」，「利賓納」是Constance家中的高齡芝娃娃，外型嬌小，毛髮脫落，樣子並不討好，Constance坦言，牠年輕時還有性格問題，「佢係咬人狗嚟架，會追住你隻腳嚟咬」。

利賓納亦是Constance從CAF領養回來的狗，04年領養時只有3至4歲，目前已屆16歲，她坦言，利賓納已沒有視力，「2013年開始右眼已經裝咗假眼，左眼今年開始視網膜受損，以前仲感受到光，依家完全睇唔到」。除此之外，利賓納的牙齒亦已脫落，需弄碎濕糧餵飼，方便吞嚥，當Constance把鐵碗放在利賓納面前，牠從東嗅西嗅，從「床舖」蹣跚地爬到碗前位置，再慢慢伸出舌頭，用盡全身氣力將濕糧舔入口中。

Constance卻對此毫無怨言，「你養佢第一日都知道，佢哋好似人類咁，會有生老病死」。她希望市民領養前，確定自己會陪伴狗隻走過暮年，「好多（主人）喺佢哋（狗隻）後生嗰陣就咩都話接受到，過多幾年就好多嘢都接受唔到」。Constance的同住母親亦指，女兒把每隻養過的狗的骨灰均放在家中枱底。