【渣馬】刀片跑手出征：腫瘤明天或蔓延到腦，但這次我一定要跑！
「由細到大，連企都好困難，完全無諗過可以跑。」39歲的翟文鳳，患有先天性血管腫瘤，右腿全部血管都有腫瘤，28歲那年她決定接受截肢手術，放棄柺杖，使用義肢。文鳳指，截肢一年才勉強可以站立，她到學校分享自身經歷。一名學生問她有甚麼夢想，她當時想了想回答:「我想跑。」1月17日，文鳳將參加渣打馬拉松10公里賽，天文台料會有大雨，但文鳳從沒想過放棄，她說:「除非大會取消賽事， 如果唔係我都一定會跑。」
穿起跑步專用的刀片義肢，文鳳坦言不易控制，而且容易絆倒。試過幾次練習，由體育會的義工協助，文鳳終於可以稍為快步。「只係快行，感覺倒嗰陣風，我已覺得好開心，原來係咁『正』既。」由於文鳳盆骨前的髖屈肌已萎縮，肌力不足令她跑步時更難平衡，需要更多體力，練習不足半小時，文鳳已汗流浹背，但仍然一臉滿足。由於訓練時間短，她直言對於渣馬比賽信心不大，目標是可以完成賽事。
文鳳自出娘胎全身的血管已有腫瘤、左耳中度弱聽，與人溝通有障礙，又常出入醫院，課堂進度無法跟上，自信心很低。「其實我細個唔敢望人，十幾歲開始先肯同人講野。」文鳳指，轉變是由於開始工作後，遇到一班好同事，加上信仰令她慢慢懂得放開。「遇到難關，其實痛苦感覺真係自己先知，但係心態改變咗，所有嘢就會慢慢改變。」
文鳳記得，截肢初期自己根本無法駕馭義肢。「戴義肢其實係好焗，仲會刮到損哂，根本無辦法企起身。」她指自己當時每日都以淚洗面，有 4至5個月時間自暴自棄，直至聽到義肢矯型師的一句說話，「係你戴住隻義肢，唔係義肢戴住你」，令她重新振作。最終她花了近一年時間可以不靠柺杖站立。
生命影響生命，文鳳希望分享自己的經歷可以協助同路人走過難關。她表示，多年來無論經歷過甚麼，從來沒有想過放棄生命。「我覺得每個人既生命都有價值，我既價值唔會因為少人一隻腳而少左。」文鳳指，自己已經切除脾臟，而肝臟、腰、顱底仍然有腫瘤，生命每分每秒都受到威脅，不過她倒卻看得輕鬆：「或者腫瘤聽日就會上左腦，你就再見我唔倒，但我今日能夠活倒，已經好開心。」
明天就要比賽，天文台料周日可能會有大雨。文鳳坦言，下雨會令跣腳及義肢移位的機會增加，她會準備雨衣及小心行事，但從沒想過放棄。「任何事未去到嗰個地步，都先唔好諗到太差。」她透露，自己及其他截肢跑手仍士氣高昂，為安全計，大家都會減慢速度。她相信自己未必可以兩小時內完成賽事，但說:「佢未出架車來車我走，我都會盡力行到終點。」