【職場醜惡面】做義工、成為「良心企業」，只係為咗拎獎？
你係咪做緊大公司？上市公司？公司有無義工隊？你有無參與過？你又有無諗過點解公司要做呢啲嘢？我相信有啲公司係真心想關懷社會，為弱勢社群出一分力，但可惜嘅係，亦有唔少公司搵員工嚟搞、搵受助對象嚟搞，背後只係一心為拎獎……
或者你無特別留意，但其實你平時行街或者瀏覽一啲公司網頁，都會好常見到一個標誌，係表揚該企業有良心、證明間公司平時有關懷社會的，呢個標誌對你嚟講唔重要，但對非牟利團體及一啲「良心企業」嚟講就好重要，實際對生意有幾大幫助？我唔知，但對「面子」就好大影響，所以全香港所有大公司都肯肯定會參加，而點樣先可以拎到呢個標誌？其中一個方法就係做義工。
我曾經做過一間外資公司，每個月都會舉辦最少一次義工活動，種類好多，包括探訪老人家或智障人士、清潔海灘、垃圾分類等等，講真啲活動都幾辛苦，但做得好開心，因為公司係真心想幫人，唔係純粹為出名，捐完錢、做完善事都好低調，可以講無咩直接得益，但都繼續每個月堅持做，而參加嘅同事都係出於自願，所以大家唔會呻……做完呢間公司，我天真地認定所有「良心企業」都係咁真心，所以之後轉工，我都會特別搵一啲有義工隊嘅公司應徵，直到我遇到一間嚴重沽名釣譽的港資……
又或者咁講，可能公司董事、高層嗰啲的確係有心想幫弱勢社群先話搞個義工隊，但可惜搵咗個超無愛心，又怕曬、怕污糟嘅港女去執行，結果每次義工活動都係慘不忍睹。
呢個港女係我上司，佢叫我諗吓有咩義工可以做，我諗咗五個，結果全部比佢Ban晒。
去沙灘執垃圾（港女上司話曬同污糟，唔做）
探訪老人家（港女上司話老人家有臭味，行動又慢好麻煩，唔做）
同智障人士做手工（港女上司話怕啲同事會驚智障人士，溝通唔到，唔做）
帶患病兒童去主題公園玩（港女上司話有病嘅人好多負能量，唔想佢地將負能量傳比同事，唔做）
捐錢同物資比愛護動物的機構，順便參觀（港女上司話同事可能怕動物，而且動物都係有臭味，唔做）
好明顯，所謂嘅「同事怕、同事話」，其實佢本人怕／唔想。然後我繼續交咗好多個提議出嚟，繼續都係被Ban……最後竟然係死纏爛打一個團體，要對方搵一班非常健康、有飯食有學返有屋住，完全唔需要人幫助嘅小朋友，去整Cupcake。
能夠諗到「去幫一班完全唔需要被幫助嘅人」已經夠偽善，仲要成個整Cupcake嘅過程中，佢都不停鬧啲小朋友，當小朋友係佢下屬咁，又話人蠢、話人慢，當中有個小朋友因為唔想整污糟隻手而唔肯掂啲材料，小朋友扭計其實好小事，點知港女上司竟然好大聲話：
媽咪無教你咩叫禮貌咩？你再唔整就留你喺度唔比返屋企！
又鬧人媽媽、又嚇人無得返屋企，小朋友一聽到就立即嚎哭起嚟，全場人包括社工同我地公司同事都望晒過去，港女上司尷尬不已，情急起嚟又對小朋友呼喝：
你唔好再喊喇！而家係你做錯事，我提醒你咋。你喊，其他人會以為我蝦你架，快啲去洗面！
社工急急拖走小朋友……
自己想整Cupcake而用「義工」名目使公司錢為自己寂寞的假日搵節目，再呼喝「受助人士」，呢種「義工」係幾咁假仁假義！我參加過該公司幾次「義工活動」後，提醒自己將來做家長，千祈唔好將小朋友交比打著公司名號的義工隊，小朋友好地地出去比一個陌生人鬧，怪可憐的，仲要家長永遠唔知。
活動後仲要用公數去食餐好，話慰勞「義工」辛勤工作……
各社會組織鼓勵企業服務社群當然好，但缺乏監管能力、審查準則寬鬆，最後只會累積到「良心企業」的「量」而沒有「質」可言，改善唔到社會環境之餘，仲做死沽名釣譽公司內的一眾員工，呢啲黑心Cupcake班，真係上司逼我去先會報名……更多職場醜惡事例，歡迎到我Facebook Page一齊分享。
（文章純屬作者意見，不代表香港01立場。）