木頭車起家45年上水學榮書店10月告別 老闆嘆：撐到尾都係要結業
互聯網與智能手機改寫人類生活習慣，亦令屹立上水區、為莘莘學子服務了45年的「學榮書店」，宣布將於10月走進歷史。從小在旺角書店街打拼的老闆易榮，由擺地攤、木頭車起家，做到搬入樓上舖，再從九龍轉戰新界區學生市場，見證了香港教科書由幾毫子一本至現時動輒數百元、甚至由實體至無形電子書的重大轉變。
易榮慨嘆書店行業被互聯網影響深遠，令他不由得選擇結束大半生心血，目仍有數千本二手課本、漫畫和小說，盡量以「大平賣」清貨。他感慨地說：「呢行一路走緊下坡，一路下坡、下坡，只係睇吓個盡頭去到邊，做書呢行話要拿住本書，真係夕陽行業，真係冇得翻身！我哋仲愛錫呢行都係撐落去，但係撐到尾都係要結業......」
「學榮書店」位於上水新成路113號一幢唐樓的閣樓，大廈地下外牆貼着「光榮結業」、「一律清貨大平賣」，沿樓梯拾級而上，看見梯間的「學榮書店」招牌早已褪色。走進店內，每個角落都擺放着一排排書櫃，若置身兩排書櫃之間，恍如走入時光隧道，隨手拿起一本書，可能是80、90年代的教科書、舊學制試題；成名於60、70年代的言情小說作家瓊瑤作品；本地著名漫畫家馬榮成的作品；又有經典日本漫畫《男兒當入樽》、《龍珠》、《金田一少年之事件簿》等，大量童年回憶瞬間湧入眼簾。
「呢啲書都好新淨的，如果揼咗就好嘥囉！」現年68歲的「學榮書店」老闆易榮從書櫃取出一本本教科書存貨，慨嘆時不與我，再搬出一本重甸甸如磚頭的字典，笑說：「𠵱家啲人要查字都會用字典，不過唔係攞住本實體書嚟查，而係喺網上查......」現今人人都在網上向「Google」求救的年代，連電子辭典機都變成電子垃圾，易榮已想像到其手上的「啞老師」，終有一天會被埋於堆填區。
傳承父業在書店街打滾 從地攤、推木頭車做到樓上舖
在上世紀五十年代初，易榮的父親在旺角奶路臣街和廟街擺地攤賣二手教科書、後來改為推着木頭車賣書。當年只有6、7歲的易榮與胞姐便跟隨父親在被稱為「書店街」的奶路臣街打滾，因而被街童取花名為「書爺」。他形容，香港的第一代教科書店及二手書店老闆，大多是在書店街打拼起家，那裏稱得上是舊式書店的「木人巷」。
他憶述：「嗰時好早我就去幫手，暑假老豆就喺奶路臣街賣書，到夜晚喺廟街幫佢預早佔位賣書。」《尺牘》、《珠算》及《國語》這三本課本，是當年所有香港學生的指定教科書，「嗰時執嚟執去都係呢幾本，唔會好似𠵱家啲教科書咁亂，當年賣幾毫子、個幾銀錢一本，𠵱家教科書賣到二百幾、甚至幾百蚊一本，真係好貴！」
雖然在街頭賣書的日子艱辛，但當年二手書市場需求極大。易榮於20餘歲時結婚，並自立門戶與妻子在書店街推木頭車開檔賣書，但因年代轉變，當年政府改為採取趕絕小販政策，流動書檔被迫經常「走鬼」。他於是在西洋菜南街租了一個百多方呎的唐樓尾房入舖，經營第一代樓上書屋。
由旺角轉戰北區45年 「學榮」以服務學生為榮
昔日沒有互聯網，不像現時在網上平台發貼文般容易作出號召，要徵收舊書則要「諗諗計」，有「書爺」之稱的易榮當然有計，他憶述：「當年我自己首創去新界啲屋邨『洗樓』，嗰時啲屋邨保安未咁嚴格，同啲暑期工一齊上樓，逐家逐戶問有冇舊書可以回收。」他指當時曾到沙田、大埔、屯門、元朗的屋邨收書，「趁放暑假就去收，收完就夠賣成個暑假」。
易榮坦言，因為秉承父訓做人要老實、有良心和勤力，所以他一直以來都是正經做生意，從不在街頭搶客（俗稱「撈魚」），主要靠熟客光顧。反而他在書店街見證過很多因搶客而引起的紛爭；後來書店街更出現客貨車檔來分一杯羹，高峰期有多達數十輛客貨車擺檔，愈做愈混亂。
書店街的轉變，令兩夫婦決心轉戰新界市場，在上水龍豐花園商場開舖，以售賣二手課本為主，取名「學榮」，易太說：「其實嗰時好簡單㗎咋，嗰時諗住我先生個名叫易榮，攞個榮字，我再心諗，為學生而服務喎，就叫『學榮』，就係咁簡單店㗎咋！」
90年代二手書全盛期 做一個暑假夠交一年租
「由90年代至2000年，就係賣書的高峰期，舉例一本《金田一》一出新期數，你坐火車就睇到㗎喇，坐公共車，個個都拿住本書睇，唔同𠵱家個個都拿住手機睇，嗰時做舊書真係好好做！」回憶起賣二手書的全盛時期，易榮即時眉開眼笑，滔滔不絕。
他形容，當年舊學制比較簡單，以中學來說分開三個階段，包括中一至中三的初中階段；中四至中五會考放榜；最後是中六、中七高級程度會考，每個階段都是一層又層地來買書賣書。首先每逢暑假，學生和家長帶新書單來買書，同時會帶來一批舊課本作回收，他說：「佢哋會帶一份舊書嚟，阿媽又搵架買餸車車啲書嚟畀我哋，然後就攞張書單嚟，執份書走。」
易榮續指，暑假過後，學校會要求準備會考的學生購買歷年舊試題（past paper）來狂做練習，而準備高考的學生則要寫閱讀報告，他們又要購買指定讀本，如錢鋼的著作《唐山大地震》等。
他又透露，過往暑假都是賣書旺季，以當年舖租約6萬元計，「做一個暑假生意，就夠交一年舖租」，平日即使生意較淡，仍足夠維持其他開支。易太更憶起當年在暑假熬至體力不支，一度頭暈暈要到醫院求診，她笑說：「嗰時醫生話我血壓低要多啲休息，叫我唔好做嘢，但我話唔得呀，請醫生幫我打支針後，繼續返舖頭開工。」
「書中自有黃金屋」，易榮有深深體會，賣二手書給他賺來人生第一桶金，更由一間書店開至高峰期多達五間，業務不止限於教科書，還有出售及出租小說、漫畫，更與友人合資在澳門也經營漫畫店。
兼做租小說、漫畫 最難忘書迷撲書
80、90年代是漫畫店的黃金時間，當時每本2至3元，最多租借一星期。易榮與太太憶述風光時，高峰時期在90年代開了四間分店，店內的二手書種類亦變得愈來愈多，更一度將書店化身成租書店，出租漫畫和小說，不少人都喜歡到店內「打書釘」：「尤其是係漫畫，如果套漫畫係好出名，一出嗰本書已經會喺漫畫舖排晒隊。」
易榮回憶，當時熱門漫畫眾多，包括有《金田一》、《消防員的故事》以及《男兒當入樽》，一眾書迷更為「撲書」不時會出現「爭崩頭」的場面：「佢哋會叫住個伙記，叫佢「一定要留畀我呀！」，（漫畫）最高峰都係留兩套，因為成本好大，一本漫畫要三四十蚊，租都係兩蚊至三蚊度，要租成十幾次先返到本。」
經營四十五載，學榮書店陪伴不少學生渡過求學時期。易榮說，多年來，十分重視店舖聲譽，傳承父親教誨：「喺賣書嗰到都有好多手法，咁我哋係均均真真、老老實實咁做，唔係話對學生幫助好大，做咗呢幾十年都叫做問心無愧。」
即使在新年期間舖頭同樣是全年無休，初一亦不例外，他解釋，因新年屬書業「旺季」：「初一初二都開工，休一日。點解初一都會開呢？，因為喺租書初一嗰陣時啲細路仔最多錢，佢哋冇咩娛樂，嗰時冇咩節目又冇手機冇盛會嚟租書睇、一有利是錢就會嚟租書睇。」
教科書不斷改版 舊版淪為廢紙
多年來學榮書店出售中小學各科教科書，為不少人求學時期的必讀課本，易榮坦言，教科書不斷改版對店舖出售課本亦有一定影響。他指，售賣教科書和預科參考書，需要大量存貨，可是現時教科書不斷改版，存貨反演變成風險：「曾經有段時間，我們需要畀錢人將賣唔出去的舊版書扔掉。」
他又指出，近年出版商面對各種困難，某程度上亦對店舖出售教科書有所影響：「好亂，𠵱家係連我哋配書畀學生都覺得好亂，事關（出版社）真係百花齊放，出版社都有出版社嘅難做，佢哋要打入個市場都辛苦。」
實體教科書變得相當昂貴。但他表示理解，因書店經歷同樣問題：「唔貴又唔得呀，因為出版界又係好似我哋咁，有十個月係淡季，做個兩個月係全部蝕返晒入去，另外出版社又有作者費、印刷費又好犀利，一本書𠵱家都去到三四百蚊，以前一本新書都係十零蚊。」
互聯網普及 嘆手機上網乜都有得睇
但在網絡資訊唾手可得、電子書普及的世代，要守著書局絕非輕易。易榮不禁感嘆，走進千禧年代後，互聯網普及，難以繼續以舊時的方式經營，由全盛時期四間分店，最後縮減至剩下上水店面，書籍種類，昔日以教科書為主的市場亦逐漸被消閒書籍攻佔：「但如果係話搵資料性嘅嘢，𠵱家發展到好多人都唔會再喺書搵，會喺手機搵，小說、漫畫乜都有得睇啦！」
問及他對於實體書式微會否感到可惜。他坦言，多年來，從懂事起生活上就完全離不開書，實在是「對書對到厭」：「好老實講，我覺得書同你揸住部手機睇係好唔同，有個感覺，尤其是係睇漫畫，上網睇漫畫係睇個故事，但係你睇書係睇個手工、畫工，好緊要！啲細節位要喺書先睇到。」
他慨嘆，書店是一門生意，卻不是賺大錢的生意，對45年的心血快將結束感到可惜，嘆不由得他選擇：「呢行一路走緊下坡，一路下坡下坡，只係睇下個盡頭去到邊，做書呢行話要拿住本書真係夕陽行業，冇得翻身，我哋仲愛錫呢行都係撐落去，但係撐到尾都係要結業。」
熟客嘆老舖消失始懂珍惜
結業消息一出，除附近的街坊外，亦有老顧客從遠道而來到訪，令他感到窩心，更多的卻是不捨，皆因學榮書店已紥根在上水二十載，早已成為社區的一份子。
內地四年級生童同學喜歡看漫畫，試過在書局買到絕版精裝書。他指，現時借書和網上買書太方便，令書店經營更困難。童慨嘆大一時港大附近仍有漫畫店，如今到四年級就連二手書店亦結業。
熟客郭小姐則表示已光顧書店十多年：「都好多年前啦，阿囡都嚟呢度買書」，她形容在這裏擁有很多美好的回憶。她指學榮教科書及補充練習種類廣泛，很多課題都可找到不同類別書本。對於學榮結業，她都感到十分可惜，亦認為要購買實體書，除了學榮都很難找到替代。