【葉繼歡病逝】回顧賊王福音月刊親筆信自述：後悔，幸好沒傷人命

一代大賊王葉繼歡今晨病逝。各大傳媒給讀者重温葉於九零年代持械行劫港九多間金行、屢次在街頭與警駁火的畫面。《香港01》亦再訪問觀塘物華街金行經理，經理：「（葉繼歡）有報應，當年賊王落網，讓珠寶業界鬆一口氣，至少有殺一儆百效用。」
然而，有福音月刊《天使心》卻重登一篇葉繼歡7年前撰寫的親筆信，揚言「我後悔了！」。信中他一一回應讀者的提問。昔日惡貫滿盈的大賊，信中卻流露出一生的無奈，概嘆70年代來港打工為改善家人生活，卻被嘲「港燦」屢被歧視，難找長工，生活逼人走上歪路。他的改變，始於三位牧師關顧，讀畢三次聖經後信主，更謂：「如果呢個世界的人，個個人咁有愛心幾好呢！

原文節錄：

17歲來港打工  賺錢為改善家人生活

在信主前，我跟你們都是一樣，是一個平凡的人，我本身係大陸出世同成長，剛踏入青年時期，由於當年大陸剛啱開放無幾耐，自己的性格衝動，為咗家人有啲好生活，因此在我十七歲時，便偷渡來香港打工賺錢，目的是想改善內地家人的生活。來到香港後，因我學歷不高，祇有小學三年級的知認，故祇有從事低下層的工作。我曾做過風扇廠，電子廠，手錶廠，水電學徒，搬運，裝修等工作。

「綁架撕票綁匪比我更可怕」

由於我到香港無幾耐，講說話發音唔正兼帶有鄉下音，故經常俾土生土長的香港人取笑為「阿燦」及帶有「白鴿眼」的目光對待，當時在我眼中，覺得土生土長的香港人，是「先敬羅衣後敬人」的那種人，所以我才做了這麼多份工作，每份工作都做不長久，後來遇到個舊同學，佢親戚是撈偏門的，那時候我便跟他的親戚出來撈偏門，（因當時是八十年代中，容易搵錢）從此就改變了我的一生，直至到我二十三歲時便首次被捕入獄。有人會覺個我係窮兇極惡之人，給我外號『頭號通緝犯』，極度危險人物等，但我可以講你知，我雖然有做過壞事，但從來無殺人，比起一啲綁架撕票的綁匪，他們令到受害人失去至親、陰陽相隔，那些人才真正令人感到可怕。我不是說我做壞事情係啱，每一個人都有不同的目標，好多事情都係人在江湖，身不由己的，况且我亦已得到應得的懲罰。

《天使心》原文：《天使心》獨家刊載賊王獄中書信　回顧悔罪歸主之路

好多事情都係人在江湖，身不由己的，况且我亦已得到應得的懲罰。

「當時我確實係需要金錢，才犯下轟動一時之嚴重罪行」

信主前覺得金錢是很重要，因為可以改善家人的生活，與及不用給別人睇唔起我，我係攞命博返嚟㗎，有邊個人唔鐘意錢吖，所以當時我確實係需要金錢，才犯下轟動一時之嚴重罪行。

我記得在1996年5月13日凌晨時的下半夜，我俾警員開槍射中三槍，其中一槍導致我下半身癱瘓，在瑪麗醫院留醫兩日後，就掟我入來赤柱監獄，還要在監獄內的無助環境下，一個人在監房內生活，覺得一砌都很絕望，意志很消沉，直到2000年初，基督教更生會的總幹事潘國光牧師，黃子坤牧師與白培德牧師，他們來到赤柱監獄接觸我。他們用好親切，關心態度同我傾偈，從沒有介意我的過去，並非只係同我講耶穌咁簡單。

連看三次聖經信主

試過連續睇三次聖經，每次睇一千多百頁後。我的感受：如果呢個世界的人，個個人咁有愛心幾好呢！大家互相幫助，老實講，我咁大個仔都係第一次睇咁厚，咁正經嘅書。經過潘牧師、黃牧師及白牧師三位多年來對我的不離不棄栽培，令我感到有重生的感覺。

在2004年，我決志信主。

如果呢個世界的人，個個人咁有愛心幾好呢！

希望時間沖洗心中罪疚  珍惜家人

我以往做過的錯事，當然我感到後悔啦，尤其是對家人來講，帶來家人深遠的麻煩、負累同擔心，對社會亦做過一些傷害，尤幸沒有傷害人命，經過時間的洗禮，希望可把心中的罪疚，慢慢地清洗過來。

信主後，我確係對人生有另一個睇法，覺得人生就好像一個旅程，當每個人去到終點站時，亦都要落車，所以在旅程的過程中，要懂得珍惜現在，尤其是要珍惜家人的親情，關懷，對於金錢來講，要量力而為，從正途方向處搵錢，千萬不可走捷徑歪路。就俾你搵到很多錢又如何，一旦失去親情或失去至愛的親人時，就會後悔莫及，我就是最好的例子（半身癱瘓）。