【街坊Look】大埔「蘇東坡」：「我哋捱慣苦，唔怕凍嘅！」

We are the people.
每一個街坊都是建構社區的一份力量，但從來沒有一個欄目，是屬於他們；
他們的面孔從來都是模糊的。
用一張相片，看清一張面孔，記街坊的衣食住行、街坊的人生；
這一周，寒流急臨，我們看看香港人如何渡冬。

哪怕是7度6度還是零下，藍生都不怕：「我哋捱慣苦，唔怕凍嘅！除非你嬌生慣養架啫！凍嘅話，就著多件衫，熱未著牛記笠記囉！」乍聽之下，其瀟灑，其從容，還以為自己遇上再生蘇軾，撐竹杖踏芒鞋，徐徐步過大埔墟。

66歲的藍生，土生土長大埔人，的確吃過不少苦，才不懼寒冬。

「我三歲嗰陣老豆就過身。我阿媽賣魚小販，我五歲就要幫佢手。我細細個就識劏魚，擔水同餵豬。仲記得一大早要去大埔魚市場同人搶魚，搶唔到嘅話就要揸兜！」藍生還記得，五、六十年代，低下階層妄想生存，就得打一場埋身肉搏戰。「果時做小販俾差佬祝嘅話要坐監。但係我阿媽反抗，會同人搏鬥。所以我就明白，點都好，唔好俾人蝦蝦霸霸。」藍生說。他形容自己的成長，就是要不停的跟惡勢力開戰，保護自己，不要被人欺負。

已退休的藍生仍跟「魚」有緣，現在每天也會到兒子在大埔墟熟食中心開設的魚湯米線檔幫忙打理。退休生活寧靜安逸，再也不用搏鬥，藍生笑得開懷：「見到個仔有自己事業，咁未幾好。」

「人最緊要知足常樂。政府而家咁多大白象，一味講空話，唔好咁大期望啦。」藍生說。

「天氣幾凍都好，天意嚟架嘛。有乜好怕呢？」蘇軾又徐徐走入大埔墟街市，也無風雨也無晴。