【光復元朗】721襲擊原居民心痛：唔好種仇恨，香港人不打香港人

白衣人在西鐵站無差別毆打市民，車廂有人跪下求饒仍被拳打，看著一幕幕的即時新聞，住在元朗的原居民陳太太（化名）忍不住悲慟落淚。「發生咩事？光天化日下咁樣衝入車廂打人，維持咁長時間，好恐怖。呢件事已經成為元朗人嘅創傷。」在元朗土生土長，她沒想過這出生之鄉會有這麼一天——人人自危，街道蕭條。市民申請今日（27日）在元朗遊行被警察發出反對通知，但公眾仍計劃以不同方式前往元朗，表達抗暴力的想法。陳太身為原居民，只有一個心願，「希望大家平安，不論外來人或元朗人受傷都會好傷心，香港人不應打香港人。」

元朗無差別襲擊　「無晒常性」

7月21日，陳太太傍晚回家已經收到消息，指有白衣人在元朗市區遊走。「收到相話班人一齊食飯仲影相，我以為佢哋影下相就收工，原來夜晚先係正式行動。」晚上十時許，有白衣人現身西鐵站不分衣著顏色毆打市民，陳太太追看即時新聞至凌晨，「開初街上有白衣人打人，以為議員去現場會好啲，點知夜晚衝入車廂廝殺。」

縱然不在現場，陳太太看見熟悉的西鐵站變成戰場仍然激動：「好似無晒常性，佢哋知唔知自己做緊乜？佢哋真係村民？」更讓她難過的是警察遲遲未到現場救援，「現場回答記者嘅警察係咪人？態度咁差，可以唔睇錶？市民打電話報警可以被cut線？如果打嘅係你屋企人你會點？」

矛頭指向原居民　「畀人煽動、擺上枱」

元朗襲擊過後，有人把矛頭指向黑社會，也有人指向圍村人、原居民，身為元朗原居民的陳太太，心裡也有疑惑。她覺得原居民或許會抱有保鄉衛族的心態，並堅信黑衣示威者會搗亂村落，「想畀顏色或教訓外人，有呢種心態唔出奇。但當中都係有人挑撥、煽動，否則唔會誇張到離開村落，走入地鐵無差別打人。你話無外援，我唔信。」

「我相信唔係個個參與者都係村民，村民好似被人擺上枱，本來出發點可能係顯示團結、保護自己。以前村與村不和，都唔會打女人、打細路！」

佢哋可能一世人未試過出嚟行一次，除非牽涉到政府收返丁權。涉及自己利益，就拆天了

少數的聲音　「身邊人接受唔到新想法」

陳太太婚後住入另一村落，是原居民所稱的「外嫁女」，並未擁有原居民權利。她形容自己「原居民身分係零」，也不喜歡部分人「套丁」的行為。她六月以來一直參與反修例遊行，希望政府回應民間五大訴求，「100萬人、七一、200萬+1遊行我都有去。遊行人數不斷增加，破哂記錄，但對政府有幾大影響？」至今，政府除暫緩修例，未有明確回應其他訴求。

「我唔同意衝擊，都唔會做，但理解點解。因為咁多人企出嚟，政府都係一意孤行，自殺死嘅人一句半句都無，逼到年青人行呢步。」

在親人或鄰居圈子中，陳太太自覺是少數的聲音。「佢哋唔太接受遊行示威，唔太接受新嘅想法。」她覺得，這跟部分原居民恪守傳統文化的慣性有關——比如重男輕女至今仍然為村內金科玉律。「接受唔到反修例運動，覺得站出來遊行抗議都唔啱，要忠於國家領導人。佢哋可能一世人未試過出嚟行一次，除非牽涉到政府收返丁權。涉及自己利益，就拆天了。」

創傷過後　元朗人心願是眾人平安

一輩子不願搬離元朗，陳太太對元朗的感情是不言而喻，而7.21發生的襲擊事件，她形容是元朗人的創傷。「7.21嘅畫面好難磨滅……諗起好難過、好辛苦，成為咗創傷。我哋同經歷沙田衝突嘅街坊有同感，不同的係，佢哋當日面對的是警察，而我哋係黑社會、原居民同警察。」她至今仍無法平靜：「心好痛，有啲朋友都係元朗大、係元朗出世，大家唯有一齊傾有幾嬲。點解煽動人嘅人仲有人崇拜？」

有元朗居民申請今日（27日）遊行被警方反對，公眾計劃以不同方式前往元朗表達抗暴力的想法，陳太太計劃放工後在元朗到處看看。「我相信大家冷靜就唔會有太大危險。唔好搞屏山鄉事委員會、警署等等，同唔好入村，希望大家平平安安。」她對星期六情況猶豫不安：「唔相信打鬥會再發生掛，如果今次都無警察……」

帶著創傷生活，陳太太唯一心願是今日一切平安。她希望遊行人士和示威者明白，原居民中有不參與暴力行為的人。「原居民有好人，好多人唔清楚咩事，無參與暴力。大家都係香港人，可以和平共處，唔好種落仇恨。」她哽咽著續話：「身為土生土長嘅元朗人，不論外來人或元朗人受傷都會好傷心，香港人不應打香港人。」