【倒數6天】沙田海鮮舫結業前爆場　舊客回憶：少時家貧高攀不起

「沙田沒有海鮮舫，也許不痛不癢，卻像新娘的頭上少了頭紗。」一位居於沙田的80後街坊說。
沙田的明星海鮮舫將於月底結業，轉手予婚宴公司會所一號。海鮮舫轉手後會裝修，並於明年5月重開。這個船身外形的石舫前稱「敦煌畫舫」，已在沙田區屹立近30年，一直都是沙田區的地標。有不少市民於昨日（10月22日）專程來明星海鮮舫飲茶，順便拍照懷念一番。午市時段的海鮮舫門外、大堂場面熱鬧，等候時間起碼都要近1小時，處處都是拍照、等位的客人。'
記=記者

自幼家境清貧：唔敢有「非份之想」

徐先生這天特地和家人前來飲茶，懷緬兒時和工作的回憶。

徐先生：兒時家住深水埗，家境清貧，一年只會去飲2、3次茶，飲茶已經算得上大事。後來小學學校旅行，搭車經過畫舫時也是想：「經過見到就算㗎啦，好高級。𠵱啲係遊客地方嚟㗎嘛。」 到了中學，間中逃課，和女孩到沙田「橕艇仔」也會經過畫舫。

記：細個有冇嚟過飲茶？

徐：未有咁嘅非份之想（去畫舫飲茶）， 因為𠵱度屋企人負擔唔起。後來在沙田區工作，與同事外出食飯，間中也會到畫舫飲茶，但多數去第二度，始終呢度都係貴啲。

記：貴幾多？

徐：在20年前，到區內其他茶樓食飯，平均一個人要30多元，到畫舫就要花上40至50元。但是，依然較喜愛到這裡飲茶，地方闊落啲，又唔會有人搭枱，唔會有人推著車係咁叫，清靜啲！」

業餘畫家：預知做唔到幾耐，去年速寫

Cynthia：我其實冇乜深刻回憶，但只係敦煌畫舫年代，細個爸媽都有帶我嚟飲茶。佢夜晚有燈好靚，平時經過都會影吓，但都覺得佢唔知做到幾耐，所以之前畫咗一幅畫先。希望佢轉手唔好改外觀。

攝影師：兒時總等它駛離岸

阿豪：想不到要結業了。小時候不知道，還以為它會像真船會駛離岸，奇怪為什麼每次經過遇不對時間看到。𠵱家返工踩單車，幾乎每日都會經過，實在捨不得。

記：ClubOne表示接手後會保留外形，你點睇？

阿豪：雖然新手接手表示會保留外形，但會「加添現代元素」，希望不會變得奇奇怪怪。一直覺得明星個燈牌都幾醜，同船身格格不入，以前敦煌牌匾，單身最對味。接下來還有些時間，要多紀錄一下。

80年代划艇手：以前河水是餸渣

吳松根是85年中大划艇隊：「以前兩旁沒有高樓大廈，城門河大風大浪，划艇初哥好難平衡跌落水，全身都好油潤。因為80年代畫舫與划艇中心為鄰，洗碗水、飯餸菜渣都倒進河裏，河面像濃湯浮著一層油。」

相關文章：【城門河】「臭河」被淨化　中大划艇人見證：有魔鬼魚同水母

跑友：發夢見到船頂被拆去

陳小姐：沙田人稱它做畫舫，大概我們都懷緬敦煌嘅年代。變了明星，變得難吃，和家人少去了。但畫舫是好多跑步者一個終點的目標，以前同爸爸一齊跑步，每日都會經過呢一度。知道畫舫要易手，原來都會好唔捨得，沙田沒有海鮮舫，也許不痛不癢，卻像新娘的頭上少了頭紗。擔憂易手後保留不了外觀，昨夜還作了一場惡夢：夢見它被拆去，支離破碎，屋頂河裏漂浮，被打撈上來。

爸爸帶小朋友來：「帶你去睇一隻好大嘅船！」

張爸爸也是知道海鮮舫轉手的新聞後，特地和一家人來飲茶。

張：20年前曾經來過，那次是爸爸帶我來，以前覺得好特別！成隻船嘅外形。

記：點解今日帶埋仔仔嚟？

張：希望將這份興奮和開心傳給自己的下一代。今朝我都係同佢講話，帶你去睇一隻好大嘅船！佢都好興奮。係有唔捨得，特登帶佢哋嚟影相，可能將來10幾年之後面目全非，都可以睇返，爸爸帶我哋嚟過。