香港冇wifi的cafe何其多：有枱有電掣就係冇wifi 快餐店上網更快
記者不是文青，但以文字為生的人，總要依賴cafe勇敢生存。一間有wifi 的cafe，是拯救無數文藝青年的避難所。Cafe提供wifi不是理所當然，只是我們發出卑微的哀鳴。
跟大家玩一個小遊戲，點擊下圖你認為哪一間有提供免費Wifi？
文末開估 !!!
有Wifi的Cafe是自由工作者夢寐以求工作室
以創作為生又或是自由工作者(slasher)，每個月好似接咗好多工作，之但係只係帳面數，有啲要遲幾個月，甚至收不到稿費，日日check戶口過數未。生活逼人，居住環境擠逼，每月負擔不起萬元以上租工作室，講真一部電腦走天涯，又唔係startup 租工作室嚟做乜。自然地，那些Cafe有個大大玻璃窗，靠窗有一個地枱，放著幾個cusion，背著一個大書櫃，還有那坐低咗成世都唔想起返身的梳化椅，成為一群自由人夢寐以求的工作室。一杯咖啡，一件蛋糕，還是我們能消費得起。
記者慣於沙田文化博物館的牧羊少年咖啡館工作，博物館提供免費wifi (雖然間中會斷線)，但環境寬敞，食物質素高食得飽。不過，一間有wifi的cafe係唔夠。記者有時候無固定工作地方，編輯話「你份稿有啲嘢改喎 !」又或者剪片同事剪好一條短片請你過目，就要九秒九揾間有wifi的cafe坐低做嘢 。冇wifi的照顧底下，數據用量好似陰屍紙幾秒間化為灰燼。你總不能光站在7-11半粒鐘，又或是同阿婆阿公去大家樂爭位坐；又或是日日去圖書館同高考生搶位，又或是日日食M記打稿，稿費未收到人都油盡燈枯。我只係想講，呢個社會的確有群打工仔，唔係為煲劇，而係為兩啖飯而依賴wifi生存。Wifi，就是「文字人」的氧氣。
既舒適又有wifi的cafe，難揾過女神啲腳毛
但要揾一間環境舒適、食物質素高食得飽、唔多人任坐唔嬲、有電掣叉電、免費Wifi的cafe，難揾過喺女神腳上的腳毛。例如油麻地，要找到舒適的Cafe已經好不容易，記者最愛就是電影中心旁的Kubrick。諗住睇場戲之前可以打陣稿，只可惜Kubrick沒有提供wifi，但記者已經叫咗杯好貴的蘋果茶，唯有硬食坐低打吓字，當真係要上網的時候，就過一過隔籬M記借wifi，揾齊晒資料就過返嚟Kubrick。
大家唔好好似記者咁膚淺，上網查「文青Cafe」，以為那些雜誌推介的文青Cafe就有Wifi提供。一，基本上有新開張的Cafe，都被雜誌歸類為「文青Cafe」，根本是一個強加的名份。況且，有張木枱，擺個書架啲雜誌就話係文青Cafe，唔通V面嘅就係女神咩！Cafe提供Wifi，亦非理所當然。
不要盲目相信店名、IG相
因此，找到一間舒適又唔多人爭位的Cafe，其實已經是小確幸，如果有埋wifi，仲可以餵飽肚皮，係開心嘅。「小房子」、「一扇門」、「屋子」等等，呢啲店名似到好似阮兆祥同盧覓雪個樣咁(成日唔記得去開嗰間叫乜名)，都是那種有地台cushion、木枱、大大個玻璃窗那一類裝潢，都好舒服。打開IG，食物相都拍出女神相的果效，加埋啲睇幾次先睇得明，似詩唔係詩的caption，嗰種陽光感、藝術氣質令你覺得喺嗰度創作一定好有靈感。三間舖頭都好大方，標榜任坐唔嬲，讓人用輕食消費空間的好地方。之但係，以上三間舖頭，邊間係食得飽冇wifi，食唔飽但有wifi，真係難答過會考啲選擇題。要兩者兼得真係唔容易，因為好多cafe提供的輕食輕過納米份子，嗰啲飯糰只夠填飽女神的肚和相機。(據記者觀察所得，通常有乾花的cafe都係食唔飽。)
有電掣叉電位，但冇wifi。
不過，的確有一種情況又真係絕望過輸咗條輸卵管。還記得有一次經過沙田的一間咖啡店Beans，眼見一張長枱，全是面壁思過嗰種自閉位，每隔都有一電掣叉電位，仲有書枱燈，心諗今次一定有wifi喇掛，就冇打電話去問清楚，點知真係冇，只可以用商場30分鐘的wifi，引言都未屙到出嚟，wifi 就斷咗，嗰種驚喜好似如廁中的時候馬桶突然消失一樣。當電腦search到有wifi，侍應又話你知：「唔好意思，呢度冇wifi。」的時候，真係想將一個keyboard 啪落自己大髀泄憤，「抵死吖，唔問清楚！」
咖啡店wifi慢過大家樂
你又唔好以為咖啡越貴，wifi速度越快。記者用通訊事務管理局辦公室OFCA的測速app，測試不同cafe wifi 上載速度，測速三次取其平均數。結果發現油尖旺區高檔cafe（咖啡$50-60/杯）wifi上載速度平均只有5 Mbps；而Starbucks平均有16 Mbps；Cafe de Coral 卻有60 Mbps，快餐店連wifi都快過人！
有Cafe提供免費wifi，甘願將地方打造成freelancer工作的Office，他們如何經營下去？只要裝修靚靚，卻被傳媒強加文青cafe之名，老闆們又有什麼看法？下回分解。
下圖邊間Ｃａｆｅ有 Ｗｉｆｉ開估！！！
講真，明明係餐廳咪餐廳，做乜叫自己做Ｃａｆｅ嚟玩人啫！