木口木面與木結緣　女生全職做木匠：即使一碌木也要珍惜

女仔人家，一副看似不太強壯的身軀，居然跑去當木工學徒，現在還全職當女木匠？
外表冷酷帥氣的Lam，經常被人形容為「一碌木咁」，老是「木口木面」，話不多兩句。訪問當日，本來也害怕會「問一句才答一句」。果然，粗口是打破人與人之間距離的最好方法。直接且真誠的分享、偶爾一兩句豪邁的粗口，感覺像與朋友輕鬆地對話。

「畢業之前已經做一份乞食嘅工，就喺木工囉！然之後畢業繼續乞食。」

與「木」結緣

今年23歲的Lam，大學時修讀社會學及社會政策系，三年前開始接觸木工這門手藝。「大學時咩都無學，好頹廢。純粹想師徒制咁學習，整遮、錶、木，咩都好啦，總之係花時間心機製成嘅作品。從來無打算畀錢去學，一嚟都無錢啦。」對木的鍾愛，是日久遞增的。「好純粹地鍾意木，見到木就有好舒服嘅感覺。」與其說她選擇做木，應該是命運選擇她要當木工。她坦言當初「邊有咁易揀師傅」，機緣巧合之下，她到朋友介紹的木工作室當學徒。「本身完全無底子，自己踩上門跟咗兩年幾。一星期去三、四日，一落堂就去，做到九點幾十點就返屋企。」

最初師傅也不知道她來幹甚麼，以為是普通街坊走來學一陣子。所以，初次學習就隨便拿起一塊木，叫她弄成匙羹。結果，頭一個月，她都是在造匙羹。「咁我唔識㗎嘛，咁照整囉。做做吓唔識又問，到後期佢先發現呢條友想長駐喺佢度，咁就由基本功開始學起。」從磨刀開始學起，到慢慢製成板凳。由幾天才完成一隻匙羹，到現在幾小時可以做完一隻。Lam和師傅試過合力把店舖殘舊的十多張板凳一次過換掉，師傅亦會在晚上教班前預先把技巧教曉她，好讓她當個小助教，「話不多」的師徒之情亦是從此建立。

「忽略咗讀書？咁又無，不嬲都唔讀書嘅，除了讀書仲有好多時間㗎嘛。」

從學徒變師傅

師傅的工作室是地舖，兼且地方淺窄。Lam曾經跟師傅坦言空間太小，發揮的空間相對減少。「得百幾呎地方，一半空間都係放木，又無位擺機。」後來師傅將工作室轉型，偶爾做展覽，有點像公共地方，讓街坊聚集在那邊聊聊天。一心想繼續做木手作的Lam心想：「咁即係我失業啦。」正值臨畢業煩惱前途的時期，剛好有朋友轉工作室想找人合伙，於是順理成章「疊埋心水」當木工。令她下定決心的原因，是起初當學徒的一個初衷。「唔喺唔情願打工，而喺一開始選擇去跟師傅，無理由師傅用兩年時間教我，但我一畢業出嚟做其他，咁我嗰兩年做咩嘢呢？」於是，她從家人借來幾萬塊，希望用幾年時間讓自己闖一闖。而工作室亦於今年開張，八月正式由學徒變成師傅。

有媽的孩子像個寶

Lam本來想改一個跟家人有關聯的名字，結果發現太難了。「喜超」、「淑萍」，怎麼組合起來就是怪。她又想過用婆婆或者公公的名字，叫「添娣」，「但都唔得，太老啦，睇完個名就唔想嚟，英文叫Timmy。」Lam分享時也忍不住發笑。而「媽的木工作室」，官方解釋是「我媽，有媽的孩子像個寶」的意思，非官方解答是「諗唔到叫咩名，所以叫媽的。做木工時講最多就喺＿！媽的！」。

當學徒時，爸媽都把她的手藝當成「玩玩吓」的興趣。直至她畢業，家人跟她說：「不如你搵份正職，木工做Part Time啦。」但她深知木工不是你教三小時、就做三小時的事，自問無辦法一心二用。有日，她獨坐在房思考，突然走到隔壁房找媽媽：「啊媽，不如我自己開。」媽就這樣一句回應：「好啊！你計劃好咪得囉。」不久後媽媽就把支票交給她。

家人對於Lam的作品並沒有一味浮誇地讚賞。反而，她有一個忠實的支持者－－她那八十五歲的婆婆。她當上木工才知道，原來素未謀面的公公以前也是木工。曾經做過一張板凳回家，婆婆很喜歡，她還以為是孫女做甚麼都說喜歡。可能，鍾情的背後，更多了一份情意結。而最令Lam感動的，是婆婆有天對她說：「加油啦，行行出狀元，睇好你！」

只對男生講粗口的師傅

回憶當學徒的點滴，師傅對她的表現當然是「有讚有彈」。有沒有被師傅罵過？「無。因為師傅唔鬧人。發火就梗係會，問多兩句會Feel到佢炆。」然後他會「妖」一聲，就起手示範。「咁示範完一次，你明就明，唔明摸到明為止，無人叫你咁蠢㗎嘛。」最讓師傅生氣是最初開錯價，他會跟她說：「你諗吓囉～你諗吓要幾錢？」結果她卻開了超筍價給客人。換來的結果，就是連續幾天打給她說同一件事，而且說教時間也不短，每次都重複那幾句：「每次開之前要諗咩...有咩...明啦嗎？咁樣唔得㗎，做唔到㗎嘛。」Lam模仿老人家那冗長帶慈祥的語氣。

「唔順㗎，但無諗過放棄。原來真喺想做好一件事，越做越發現識嘅越少。依家嘅感覺？仲係覺得自己好渣，想去不斷進步。」

女仔比男仔輸蝕？

大家對於木工的既定印象離不開力的表現、汗水、電鑽聲和男人。跟男人比較，感覺力有不逮？「體能上一定有分別，就算大家拎同一個電鑽，佢可以用大WATT數嘅。我要用雙手拎著，佢就『飀』一聲整完。」當時心想：「大力真好！」有些女生會硬要表現自己可以比男生強。Lam卻是量力而為，「因為點都唔會大力得過個男仔。」反而，她懂得擅用自己的優勢：「我比一般男仔有耐性同細心，願意花心機做好一件作品，男仔通常做完就算。」她坦言當初未懂控制力度時，經常把自己弄得遍體鱗傷。「試過一次過整十幾張板凳出嚟，好辛苦，成個背脊同右手都超攰，好似俾人打完咁。」當然，少不了就是抒發情緒的粗口：「哎！仲未做完仲未做完嘅，＿！」但當看見製成品的時候，一切疲勞也值了。

不浪費每一塊木

當上木工之後，Lam越來越覺得不用買東西，就連買木去整一件物品都覺得好浪費。家裡剛完成裝潢，除了廚櫃跟洗手間的櫃，所有櫃都不准家人買。「如果搵你訂，質素又唔好，都已經唔關價錢事，幾平都好，用一陣又要掉嘅話，咪又係浪費。不如一開始做一件可以Make sure用得耐嘅。」為了把浪費減至最低，Lam的房間除了衣櫃之外，甚麼櫃也沒有。「每買一件嘢之前，會諗有無位擺？之後就放返低佢走人。」所以她每天用來練習的木，都是撿來的，通常是被砍的樹或者打風掉下去的。

Lam教班的堅持，就是要循序漸進。有客人會「未學行先學走」，她會說要不找她訂，要不就接受那個木製品會是「岩岩巉巉」。與其開一班教做板凳的，不如你選擇一件你會用的物品，你來，我教你做。

珍惜身邊的一切，儘管那是一塊不顯眼的木頭。