Celine妹妹《全美一叮》成功晉級 7萬騷價有排升

撰文:彭嘉彬
出版:更新:
近期備受關注的Celine妹妹因為《全美一叮》而爆紅,好多人都關注到底這位只得9歲的小妹妹能唔能夠喺《全美一叮》繼續晉級,而答案系,成功!而且仲要系四位評判一致通過,成為史上第一位晉級賽事嘅香港人。大會宣佈佢入圍之後,一直喺後台打氣嘅Celine爸爸譚順生、媽咪同妹妹Dion興奮到立刻嚟個「愛的抱抱」。心情咁好,似乎Celine同爸爸都完全無畀近日嘅新聞影響到。

囡囡咁叻,全家人都當然開心。其實Celine喺參加《全美一叮》前已經參加過唔少公開表演按年賽,行內嘅知名度亦相當高。更加有知情人士透露,原來Celine妹妹喺今次爆紅之前,每次嘅出騷價錢已經高達7萬,雖然行內童星嘅騷錢一向都系比較理想,但系7萬呢個價錢實在系唔簡單,而家Celine妹妹愈嚟愈紅,愈戰愈勇,深信之前揾過Celine妹妹出騷嘅客戶都一定覺得物超所值!至於爆紅後,唔知個價位有無幾何級數咁跳呢?
一齊嚟睇返賽事嘅花絮
+3
雖然官方未有片出街,不過見到Celine參加比賽仍然充滿信心,面帶笑容參加演出,作為觀眾見到都替佢開心。雖然好多人都話佢喺搖錢樹云云,但老老實實,你有無見過一個9歲小朋友畀阿爸阿媽逼做功課系會笑得咁開心?起碼我無見過。小朋友嘅世界好簡單,大人嘅世界好複雜,不論你覺得Celine妹妹唱成點,觀眾睇得開心,小妹妹唱得Enjoy系不爭嘅事實,即使你可能唔鐘意佢身邊嘅人,但講到尾都同呢位小妹妹本身嘅意向無關。每個人嘅童年都有一個夢想,如果佢哋想做銀行家就畀人話貪錢,想做歌星就係貪慕虛榮,想做醫生律師就係畀家長影響,難道你想每個小朋友都同你講「我大個要揸巴士」你先覺得佢哋貼地?職業無分貴賤嘅時候,點解又要反向認為鐘意唱歌就係唔好?其實喺小朋友嘅世界,佢鐘意做嘅事情,系唔會以金錢為釐定準則。