煉成小巨肺原來要一萬蚊四堂 張崇基：接近名師價
近來網絡熱話離不開《全美一叮》的9歲小巨肺Celine，小妹妹年紀輕輕唱功固然好，背後也全靠爸爸(譚順生)的悉心教導。不過講起譚爸爸，呢位聲樂博士似乎比囡囡更具話題性，呢邊廂網友炮轟佢當個女係搖錢樹，嗰邊廂家燕媽媽就嘆息譚爸爸曾不顧道義搶走她的學生。但最近力Sell歌唱班嘅譚爸爸，自從囡囡喺節目爆紅後，學生足足多咗差不多一倍！
傳送門：
譚爸爸現時有近三百位門生，當然唔係由佢一個人教啦。《香港01》致電譚順生博士開辦的「Sing and You Music Center」，職員表示小朋友歌唱班大概都係$450一堂，每12堂為一個單位，小組學員3至5人，以學唱歌嚟計，實在係唔算貴，但職員亦表示這些課堂皆由譚博士的徒弟教授。問及如果由譚順生親自教授，課程收費如何？職員表示一定要單對單，收費2,500一堂，每堂45分鐘，最少要報讀4堂，而職員更進一步推銷4堂並不足夠，要上足12堂才有效果。
《香港01》問起歌手張崇德覺得譚順生的小朋友課程收費是否合理，現職「音樂人教室」校長及總裁的他表示：「商業社會又無話合唔合理嘅。」身為知名歌手的張崇德，現時在親自創辦的「音樂人教室」教唱歌，每堂也只收$1050，會員更有優惠，實在係良心價！而哥哥張崇基亦表示：「其實教唱歌的價格幅度真的可以很大，並沒有所謂公價，一般市面可見的，由六百至一千多都有，視乎老師的名氣及實力。如果二千五百元一堂，算是名師價，接近杜麗莎和陳潔靈老師的收費。」
平時出入都同咁多名人影相，又的確抵佢收名師價嘅
不過無論價格合唔合理，而家譚博士咁紅，一眾港爸港媽當然爭相報名，為嘅都係希望子女能夠成材，莫講話一萬蚊四堂，我諗一萬蚊一堂都大把人爭住報名。而譚博士近日亦透過Whatsapp回覆一眾查詢課程的家長，表示最近幾天學生由170個增至300個，數目上升了近乎一倍。其實自從囡囡喺《全美一叮》盡顯功架後，譚博士可說是證明了他的教學實力，靠實力吸學生咪幾好，唔使吓吓去搶人學生嘅。