鄭秀文45歲自覺「青春欠奉」有感受：買餸讓我不會堅離地！
年齡向來都係女生特別在意，甚至乎係介意嘅一個數字，無咩特別提都唔想提。但對於面對踏入45歲嘅天后鄭秀文（Sammi）嚟講，45歲似乎係一個重要嘅數字。
Sammi6月12日突然喺facebook發功，po文感性一番。快要變成「四條五」嘅佢表示「青春當然欠奉，aging 是人人不能抵抗的道路」，雖然Sammi咁講，但其Sammi一直都對養生非常「勤力」，不時做運動keep fit，又對健康飲食素有要求，所以佢文中所指嘅四字真言「儘(盡)力。無悔。」真係唔係吹出嚟。不過講真，其實Sammi都keep得幾好，真係少少都唔似係44歲半。
Sammi一向有「百變天后」之稱，睇相就知佢咁多年，有咩變化。
「我不是一個多愁善感的人，不過偶爾都會無la la自我感性一下。諗吓人生，諗吓生活點滴。現階段嘅自己，快要踏入四條五，（45歲），青春當然欠奉，aging 是人人不能抵抗的道路，但係我為自己一直儘力keep好我自己而proud of 自己。四字真言：儘力。無悔。還有兩個月，我就踏入四條五，簡單審視一下現階段自己嘅心態：
我愛工作，但不沉醉於名利成敗，不過仍然非常重視全然的努力和盡心盡力付出，亦希望所有工作伙伴工作開心。我愛朋友，朋友開心幸福和健康，我也加倍開心,朋友於我生命𥚃非常重要。
我愛運動，但早已不是斤斤磅磅吋吋的去計教體型，而是著眼於建立健康的身體。
我愛烹飪，沒有很高天分但烹飪帶給我樂趣無窮，而且讓我更懂得吃而且飲食更健康。
我愛親自打點生活事，（例如買吓日用品例如保鮮紙廁紙和衞生巾，買吓醬酒又或者排吓隊買咖啡和買餸....)因為它讓我不會堅離地，平衡了閃光燈生活的不真實和虛浮離地。
我愛我的家人，不用多述，四個字：永遠遠遠。
我愛學習新東西，完全來自媽媽的啟發，學習新東西的慾望的行動令我跨越恐懼而且領略從不懂到懂的趣味。
我愛我的天父上帝，因為祂十年前使我重生，建立了一個新的自己。
我愛45歲，又老一年又如何，我用最大的擁抱迎接你。」