【一首歌】港女抱怨系列　李彩華《你唔愛我啦》

男人以事業為重，真係未必能事事都對另一半照顧周到，有時OT緊都仲要收到「奪命追魂call」，打嚟抱怨，問你依樣，問你嗰樣，都咪話唔煩！特別有幾句說話，男人聽到都真係會怕怕，「態度唔同以前　成個冷淡晒」，「再見啦／無嘢啦／實在夠啦／你唔愛我啦」，聽到後真係想爆番佢一句「唔駛做咩，你養我呀笨！」可惜最後都係講「bb做完嘢就返黎啦。」

一首「港女系列」始祖嘅歌曲《你唔愛我啦》，收錄於2009年李彩華專輯《失而復得》中，由作曲人伍樂城，填詞人黃偉文聯手為李彩華度身訂做嘅歌曲，當年喺k房內無人曉，一班姊妹對住支咪大嗌「你唔愛我啦」！