誤打誤撞變南華會歌 大AL：監製覺得好賣啲
撰文：黃浩晉
出版：更新：
傳統足球勁旅南華足球隊日前傳出自願降班的消息，並發聲明指現今球壇欠缺年輕球員。《擁南躉之歌》一眾fans唱足40年，主唱大AL張武孝仲爆原來填詞人係無綫電視甘草演員「賣魚勝」。
傳統足球勁旅南華足球隊日前傳出自願降班消息，令一眾球迷感到可惜。就連於77年唱熱《擁南躉之歌》的歌手——大AL張武孝亦有同感。而且本地球隊不斷引入外援，缺乏本地新秀，大AL慨嘆：「以前南華係以冇外援為主幹，依家邊隊波贏咗都好似唔關本地球員、球迷事咁。」
相信大家亦會默認《擁南躉之歌》就是南華足球隊的會歌，到底此曲由何以來？是否來自對南華的熱愛？大AL卻說是「誤打誤撞」：「香港唔似英國啲球會有會歌，我嗰隻《擁南躉之歌》誤打誤撞變咗球會歌。因為當時我嘅唱片監製覺得，南華當時係最多球迷嘅球隊，覺得叫《擁南躉之歌》可能對唱片銷路會多啲，所以隻歌就係咁樣出嚟。」
雖說《擁南躉之歌》為銷路而作，但原來大AL本身也是南華球迷，他說：「當然我同唱片監製都係南華迷，係真嘅！舊年我好多場都有去捧場。」
「南華腳法如神又鬼馬
皆因球技卓絕瀟灑
所向無敵起腳到家
球技係佢全稱霸」
《擁南躉之歌》歌詞生鬼，到底出自哪位名家手筆？大AL爆原來係無綫甘草演員「賣魚勝」（陳劍雲），他憶述：「填詞人係『賣魚勝』，有份做《歡樂今宵》。《的士生涯》都係佢同我寫㗎，佢同我寫過兩、三隻歌㗎，喺我啱啱出嚟唱廣東歌嘅時候。」大AL更表示陳劍雲有粵曲根底，所以能夠易上口又「貼地」的歌詞。