Twins相隔9年回歸紅館連開6場騷　火紅造型大鬥性感

TWINS將於2024 年1月21-23、25-27日 於紅館舉行6場 《TWINS SPIRIT》演唱會，相隔9年再次紅館合體，今次TWINS 以《SPIRIT》為演唱會主題，準備帶給大家TWINS的精神及成軍廿多年的回憶與感動。

早前阿Sa(蔡卓妍)、阿嬌(鐘欣潼)為演唱會拍攝宣傳海報，兩人穿上大紅色服裝拍攝，又DEEP V又BRA TOP，戴上拳套既性感又活力十足。， 拍攝兩人互毆搞笑動作時，阿嬌爬到阿Sa身上，突然失去平衡，兩人尖叫倒地，工作人員馬上上前援救，幸好兩人也沒有扭傷，笑成一團，慢慢爬起來。阿Sa:「佢跌個下真係嚇鬼死，哈哈....我想用力拉住佢都搞唔掂，因為我唔係抱住佢，佢喺我背脊，好彩我哋喺地面重有個木箱托一托，所以阿嬌都冇事。」阿嬌:「冇事，哈哈，其實唯一喺傍邊用吹風機個工作人員，佢撲過來想幫我，我又跌得太快，佢手上面枝吹風槍就撞正我頸到囉，個下有少少痛。」

談到今次演唱會名為《TWINS SPIRIT》，阿嬌表示，「即係 Twins 精神，雖然見到poster 我哋喺到互毆，但係我哋個精神就係永不放手，所以廿年來都冇放開過對方！即係同今日影相嗰時一樣，永不放手，跌低一齊跌低，起身一齊起身！哈哈。 」阿Sa:「TWINS SPIRIT就係咁多年坐埋一條船，無論順景逆景都一齊，開心一齊開心，唔開心一齊唔開心。今次有咁嘅構思，係因為廿多年來我哋實在影過太多靚相啦，想影啲靚又有另類啲感覺嘅，所以就影啲好玩啲。」之前阿Sa 聲帶有事，問到她是否完全康復？阿Sa笑一笑:「都有少少擔心㗎，不過我估ok嘅。」

至於演唱會今次有咩新意帶俾觀眾，兩人表示，今次除了舊班底外，也加入了一些新班底合作，所以一定更精彩，TWINS多年來都是帶開心給大家，今次也不會例外，至於點精彩就到時睇演唱會感受，現在不能多作透露。阿嬌就話，「我估我哋會比過去演出都辛苦，因為加好多新嘢！不過好期待，辛苦得來應該係值得同好開心。」