白花油王子又出新歌 睇埋個mv真係充滿正能量
撰文：史順宜
出版：更新：
「來簡約地／愛多80年／態度未曾改變…」相信大家對哩句入晒腦嘅歌詞相當熟悉，無錯！哩句歌詞就係嚟自有「白花油王子」之稱嘅「福仔」顏福偉嘅首本名曲。福仔自兩年前推出由林敏驄填詞嘅歌曲《Don’t Beat The Kids》後，在樂壇鮮有搞作，直到昨日（1日）福仔終於有新歌派台啦！福仔今次新歌叫《Peaceful Mind Peaceful World》繼續好音樂「保持」正面形象，用生命影響生命！
「白花油王子」顏福偉日前推出新歌《Peaceful Mind Peaceful World》。新歌內容都係以宣揚做人要有夢想，世界和平，人與人之間要有大愛等等正面嘅信息。「多一些氣量 少一些戰場／多一些愛會讓你讓我」至於唱功方面，福仔保持住一貫佢獨有嘅陶醉式唱法，至於係唔係人人都buy就不得而知，不過根據佢以往嘅MV，推出不久都會引嚟網友瘋傳，而且點擊亦相當不錯。
為同性戀者打氣
講到MV方面，今次福仔疑似去到日本沖繩取景，又出動航拍技術，非常大製作。MV未有好似以往咁，用到一大班dancers伴舞，福仔亦「忍得住」未有大展舞步。MV有陽光與海灘，仲有一啲無關痛癢嘅「散shot」，例如係影下路人，街景，建築物，十足十好似以前去到ｋ房唱英文歌，但係首歌嘅MV又攞唔到版權咁，真係要講句：「哩啲咪Style囉！」不過唔知道大家又有無印象，福仔對上一首歌《Don’t Beat The Kids》嘅MV，其實裡面大有玄機，當中加入同志情節，似乎就係為同志發聲，而今次亦一樣，雖然《Peaceful Mind Peaceful World》當中有不少奇怪「散shot」，但當中有一個鏡頭影住一支彩虹旗（LGBT驕傲旗和同志驕傲旗），並唱出歌詞「每一個人每一個夢想／發光發亮」似係為同性戀者打氣。