狂寸阿BOB連摑四巴玩出火？　林敏驄：腦都冇嘅

林敏驄（阿驄）下月將在紅館舉行入行35年作品展，近期密密做訪問出活動宣傳演唱會，昨晚大台播出的訪談節目《兄弟幫》，阿驄與主持人阿Bob（林盛斌）似乎擦出小火花，阿驄還連摑阿Bob四巴，到底發生了什麼事？

節目一開波阿驄就已經摑咗阿Bob一巴，呼喝阿Bob叫佢唔好嘈又叫佢「Shut up」，之後阿Bob無論問咩，阿驄都問非所答，比如問佢點樣入行填詞，阿驄就耍佢話要識寫字，寫字寫得靚囉，又串阿Bob做主持做到口窒窒，冇做好準備功夫，阿Bob口才咁了得當然射返個波畀阿驄自己講：「由你個口講出黎先好架嘛！」，點知阿驄一啲面都唔畀：「你個口好臭阿？我以為你冇頭髮啫，腦都冇嘅。」火藥味真係好濃，阿Bob一直畀阿驄禁住單單打打，睇到都覺得佢慘。

最後見慣大場面嘅阿Bob終於頂唔順問：「你今日冇咩嘢嘛今日？」阿驄就斥責阿Bob遲到成個鐘頭，就連拍檔主持人陳國峰都補多一槍：「未夠，五十八分啫。」阿Bob就堅持自己冇遲到係阿驄早到，可能就係因為阿Bob遲到，搞到阿驄嬲嬲哋覺得唔受尊重，所以之後成個節目都係咁放暗箭寸阿Bob，真係句句有骨。阿Bob讚阿驄個節目多人睇《開心主流派》，阿驄就寸佢個《Big Boys Club》冇人睇，好彩阿驄話佢個節目頂死TVB嘅時候，阿Bob終於開口回撃保護返大台，所以真係抵TVB咁錫佢畀咁多節目佢做！

事後問返阿Bob佢就話自己冇事，又澄清冇人遲到早到：「冇嬲，完全冇唔開心，玩之嘛，出面做其他工作佢都係郁手郁腳，我同佢其實都幾熟，拍過好多嘢，完成冇任何芥蒂。佢仲搵我做演唱會嘉賓，尋日好多行內行外朋友睇完之後都send message畀我話好好笑，純粹係節目氣氛野嘅啫，都預左佢唔會正正經經坐喺到同你講野，其實佢係一個好勁嘅人，咁高Level嘅係難控制啲。」