【專訪】蔡一傑批歌手狂飆高音 以為唔走音就得：唔知咩叫感動
撰文：史順宜
出版：更新：
草蜢成員蔡一傑早前推出個人單曲《流淚的怪獸》，一首形容每個人內心陰暗面的歌曲。蔡一傑表示自己是一個感性，容易受傷，會因為很小的事而非常在意的人，所以有時為了平衡自己，除了聽音樂，他會去旅行遠離大城市，過著簡單生活才可讓他放下生活重擔。
「我係一個無音樂會死嘅人，我去到邊都要聽音樂，我會用音樂或者去旅行平衡自己心情。其實我好怕過節奏快嘅大城市生活，所以去旅行的話我會想去偏遠而且節奏慢嘅城市，過簡單嘅生活，所以當我放假去旅行嘅時候，我係所有工作有關嘅電話都唔會回覆，雖然話雖如此，但人係矛盾，我又想追求簡單嘅生活，但我嘅工作偏偏就係好急促，要我加快生活節奏。」
+6
蔡一傑：好多歌手以為飆高音就係好聽
「而家有好多歌手唱歌時都唔夠Touching，佢哋根本唔知咩叫touching，以為唔走音，飆高音就係好聽，我唔認同哩個講法。識得唱歌飆高音，但你無heart一樣唔好聽。好似我師傅梅艷芳，佢一個中低音女歌手，佢可以用輕描淡寫方式去唱，慘情演繹又可以，總之佢不同演繹方法都可以好有感染力，能夠『吸』你入去聽佢唱歌，其實好多前輩唱歌真係用心去唱，與現今只係唔走音，咬字唔清楚就收貸去比較，真係好唔同。我錄歌嘅時候就算錄完，都會用studio喇叭聽一次，headphone聽一次，車入面喇叭又聽一次，電腦喇叭又聽一次，我要求各種喇叭都可以聽清楚我嘅咬字，mixing，高中低音，我先會收貨，哩個就係我對音樂及唱歌嘅追求度。」