【流行經典50年】李克勤唱足5首歌佔一半時間　原來嚟宣傳個唱

李克勤自從轉投英皇娛樂之後，解決了同時是TVB契仔和環球歌手的矛盾，去年開始就頻頻現身TVB的節目，昨晚播出的《流行經典50年》（前稱《流行經典50強》）亦有克勤的演出，而且一唱就唱了5首歌《一生不變》、《紙牌屋》、《一千零一夜》、《合久必婚合久必婚》及《C3PO》。

雖然克勤出名靚聲、唱到CD一樣，不過不少網民都邊睇邊投訴，克勤一個人唱5首歌太不公平，更有網民直斥：「唱5首真係前所未有」。假設每首歌唱3分半鐘，5首就已17-18分鐘，再加上聊天時間、廣告時段，一眨眼就30分鐘，《流行經典50年》的一個鐘播放時間就這樣去了一半。

克勤和主持人chitchat的內容亦有人表示不滿意，因為大部分的話題都圍繞住克勤在9月舉行的演唱會，「離晒普（譜）……是聽經典，走黎（嚟）開show幾黑（乞）人憎，找克勤唱係唔錯、但要經典、唱埋d（啲）新歌就……」、「又話流行經典，原來嚟宣傳演唱會，個騷cheap晒。」

望返個節目，克勤不單止唱了5首歌，唱的過程中猶如自己開騷一樣，燈牌、繞場一圍、握手，連坐落觀席都有，說實話比開騷更多福利呀！

TVB本來已經錫到克勤燶，在6月中會為他特設一個宣傳演唱會的節目《李克勤30周年演唱會校園Live》，而這個節目更由久久未出現在TVB的梁榮忠主持，據知今次的合作是由克勤親自拉線，好多無綫中層聽完這個要求都一額汗，最後由高層余詠珊肯首才能落實，明顯是為了助克勤宣傳才開綠燈。

有心水清的網民都話克勤是TVB契仔，開行火力為他宣傳也無可厚非，亦有人指《靚聲王》時期亦是由某位歌星唱足全場，覺得沒什麼不妥。而克勤solo完畢之後，就輪到露雲娜、陳潔靈和陸寶獻唱，但她們的表演觀眾就不太受落，後來更有網民大呻：「情願今集做克勤經典30年仲好，前半集同後半集差太遠。」

遇到這個情況，你願意給克勤５首歌的時間嗎？