TFBOYS十周年演唱會　頭排一張飛黃牛價200萬人仔

王俊凱、王源、易烊千璽自從在演藝界各有發展後，TFBOYS已鮮有合體，不過隨著組合成軍10周年，「TFBOYS十年之約」將在他們出道日8月6日於西安奧體中心舉行，門票由看台580元到內場2013元（人民幣，下同）不等，不過呢啲所謂嘅官方票價又點會咁易畀大家買到！

門票正式開賣前，已經有4百多萬人預約搶票；門票昨日（24日）正式開賣後，580元嘅山頂位被炒至7千元，內場2013元被炒至3萬，而其中一段「黃牛票務訊息」更列明：前五排50萬、前四排70萬、前三排90萬、前二140萬、前一排200萬！2百萬一張演唱會門票，呢啲係咪叫真頂流？而有黃牛更表示「只有4600張門票能搶到」，未知係想暗示有人從中扣起門票，定係叫大家有買趁手。不過隨後官方售票網已發聲明，表示「本次演唱會強實名入場」又叫大家唔好相信黃牛。