【一首歌】容祖兒李克勤《刻不容緩》講適時：終於知表白刻不容緩
撰文：史順宜
出版：更新：
你有冇試過與一個對象時空交錯，Timing好似永遠唔啱？一首唱到由台上演出，到台下ｋ房無人不知嘅合唱作品《刻不容緩》。還記得哩隻歌喺當年嘅K場長期佔據住合唱歌頭３位。而學生哥亦會相約一班同學仔放學嘅時候到ｋ房練一練哩隻合唱神曲。當年唔少後生仔女都係憑住哩首歌一曲訂情，互生情愫。如果一大班朋友去K房唱歌，仲會有啲好事多為嘅「好兄弟」特登幫你點哩首歌，然後安排你同女神合唱。要數表白嘅合唱神曲，《刻不容緩》應該都係名列三甲，撮合不少男女。
2005年作品《刻不容緩》，由伍樂城作曲，編曲及監製，黃偉文填詞；歌曲分別收錄於容祖兒及李克勤的個人專輯的《喜歡祖兒3》及《空中飛人》。當年派台雖然得唔到好成績，不過勝在夠耐聽。亦都因為哩首歌，直至導致容祖兒同李克勤喺前年合作開咗一個《容祖兒李克勤演唱會》，絕對說得上係粉絲福音。不經不覺唱咗十幾年，但哩隻歌曲絕對係搵藉口邀請女仔同你合唱嘅好歌！