70歲鄭少秋開演唱會　為練舞愈來愈瘦：其實好吃力

有邊個歌手藝人唔想長期keep住靚聲，靚樣，靚身型？！但鄭少秋（秋官）最近似乎為佢自己的「骨感美」所困擾。

秋官不經不覺入行半世紀，為慶祝入行50周年，將於本月舉行兩場的紅館演唱會。每日積極為演唱會而準備的秋官，除了要專注舞步仲要為身型煩惱。本身有「排骨秋」之稱的他表示：「最近塊面係削咗啲，可能今次要跳的舞太多，舞步、節奏、歌詞，稍微用神，自然瘦咗。加上保靚聲，平日已少吃油膩、刺激食物，這個月連朱古力、生冷食物，甚至最愛的榴槤也一律禁口，可能食太清，體力消耗大瘦咗。」當問到秋官演唱會期間，太太會準備什麼「溫暖牌」飯盒為他「谷肥」時？秋官表示，太太一定會安排，但暫時未收到「菜單」。這段時間，自己忙排舞練歌，而太太就忙於處理「飛債」問題。

雖然要為增肥而努力，但秋官表示，自己已經進入最fit狀態，他說：「排舞都排到九九十十，如火如荼。但今次演唱會有很多舞步要記，快快慢慢都有十隻舞，其實很吃力。但我會盡能力做到更好更精彩，落多幾錢心機，排好佢，做靚啲！」