陳奕迅演唱會林夕遭易名　黃偉文暗寸：遲啲作者名比人改咗就冇

近日陳奕迅內地演唱會批文事件鬧得沸沸揚揚，主辦單位入紙申請年尾廣州巡迴演唱會批文中，當中《K歌之王》、《任我行》等多首林夕作詞的歌曲被「易名」。黃偉文雖然「幸免於難」保住姓名，亦不忘發文疑回應事件。

黃偉文在父親節公開爸爸年輕時照片，透露爸爸由細到大都被人話似印度人，但原來真的在印度生活過：「好似話當時有大屋大花園好多架車好多家務助理仲特登起咗個舞台比沉迷魔術嘅爺爺表演刀鋸美人盛盛𠻹⋯⋯不過後來 for some reasons 一個仙都帶唔走，只可以人離開（咦呢段咁熟囗面嘅），所以我出世前已經變返草根階層。總之好長個故仔，今日講住咁多先哈哈。）Anyway，我個樣係完全唔似我老豆嘅，否則可能一早喺 Bollywood 紅透半邊天。到時就可以帶住爸爸衣錦還新德里，唔使好似而家咁，只得一首《單車》。（遲啲如果個作者名比人改咗就冇埋𠻹）」疑暗寸陳奕迅演唱會歌單中，林夕名字被易名一事。