梁詠琪相隔5年再開紅館演唱會 對嘉賓人選保密:到時畀驚喜大家
撰文:吳子生
出版:更新:
梁詠琪(Gigi)相隔5年再次踏上紅館開個唱,今日(20/12)特假尖沙咀舉行「梁詠琪《時間遇上我們》演唱會暨簽約儀式記者會」。Gigi透露為今次演唱會搵嘉賓絞盡腦汁:「其實我係好想搵返之前合作過嘅朋友嚟,可以喺台上分享大家點樣相遇同相識嘅時候,我諗識咗我哋同嘉賓咁多年嘅粉絲,聽到我哋分享感受嘅時候,佢哋一樣都會開好心。而家我仲係請緊,可能而家佢哋會飛返多啲,所以大家都要夾一夾。」
被問到心目中嘉賓人選是誰?Gigi表示:「其實未確實嘅人,我真係唔敢講,唯有等我確實咗之後,就到時畀個驚喜大家。(是否唱經典歌?)都會呀,會將啲經典歌擺返喺一啲時間軸上面,因為今次演唱會分咗昨天、今天同明天。而家睇返自己咁多年嘅歌,舊時聽同而家聽返都會好唔同,可能有啲歌詞而家唔符合而家嘅心情,所以可能會改改啲歌詞。」
此外,Gigi透露今次演唱會將會採用三面台,舞台上更會設置機關增加視覺效果:「其實我幾鍾意做三面台,而台上可以做嘅機關都會做嘅,如果唔做得嘅話我都唔會做。(驚唔驚吊大型屏幕?)咁又唔會,其實做咗咁多次騷,就唔會驚,因為我係好相信我哋嘅團隊嘅。(入紙申請紅館難唔難?)其實我哋申請都算係好早,又唔係話難,又唔係話特別容易囉。我諗而家相信會更難,因為而家都百花齊放會多咗好多騷,咁但係愈多演唱會愈好,因為香港人好鍾意睇。」