【愛上廣東歌】ToNick《長相廝守》大熱　3冠成2017最hit歌

由Babyjohn蔡瀚億及林明禎主演的《救殭清道夫》近日票房衝破600萬，在高票房的《一念無名》、《美女與野獸》及《攻殼機動隊》的圍攻下，可算是一個不錯的成績。同時由樂隊ToNick作曲及主唱的電影主題曲《長相廝守》亦在YouTube上得到超過140點撃，在音樂平台JOOX及KKBOX上力壓容祖兒《麻煩你》、衛蘭《天敵》及AGA《3AM》等成為本地排行榜一位，並成為ToNick第一首叱咤903冠軍歌。不少網民都大讚歌曲旋律夠洗腦，無限Loop到重新愛上廣東歌！

講起廣東歌，今次的《長》都未算最「正宗」，因為ToNick創作開的都是原汁原味的口語廣東歌，好似《舐野》、《跳掣》、《相嗌唔好口》等連個歌名都包含了廣東俗語和潮語，而直白一點的廣東話歌名就有《你對我已經唔係好似以前咁》。

ToNick於2007年參加TVB的UMC音樂節奪得總冠軍及最佳創意，其後再獲著名歌曲監製趙增熹賞識，加盟成為旗下歌手，之後在2009年ToNick亦推出了一首當時在網上瘋傳的歌《關心菊英》，睇歌名就知擺明想取笑關心妍在頒獎禮上誤搶關菊英個獎，口語歌詞「你話我燶／我唔覺噃／我關心佢／佢關心我／佢係嗌我／我攞獎有乜錯」搞笑抵死，當時更有高達10萬點撃（現在累積27萬），後來關心妍更大方為ToNick擔任音樂會嘉賓，親自唱出「心聲」。