專訪｜鄭欣宜憶初登紅館因腳傷留遺憾：臨開騷先由行路開始學返起
「今次無論係喺我嘅體能上，抑或係我喺研究表演藝術呢方面，我都覺得自己係成熟咗好多，狀態都比之前好好多，所以好期待好期待自己可以發揮得最好。」
鄭欣宜（Joyce）即將在6月10-12日舉行第二個紅館演唱會《Between Us 鄭欣宜演唱會2022》，為求達到最佳狀態，早前在《Chill Club推介榜 年度推介21/22》贏得歌后寶座的她決定不慶功，只想在演出前夕達到/最佳狀態，真正享受舞台：「我唔想好似前功盡廢咁，今次真係好努力，唔想因為身體或者有任何嘢阻我發揮。今次好努力咁鍛煉身體、減磅，希望可以做得最好。所以唔使慶祝啦。」
Joyce上一次踏足這個音樂殿堂是2018年4月的《Break A Leg 鄭欣宜演唱會》，她在開騷前夕跌斷腳，需要動手術、打石膏，大大影響當時的籌備工作：「臨開騷前嗰一個月到先由行路開始學返起，所以嗰陣嘅狀態點會好呢？點可能喺一個最好嘅狀態做一個兩個半至三個鐘嘅騷？」
撰文：劉傳謙
攝影：陳順禎
鄭欣宜化妝：San Chan
鄭欣宜髮型：Milk Chan@Xenter
鄭欣宜造型：Derek Ho
鄭欣宜服裝：Loewe, Joyce HK, Jimmy Choo
場地：海洋公園萬豪酒店
彌補4年前首開紅館遺憾
5年前突如其來的腳傷，幾乎令Joyce第一次進軍紅館的美夢破滅：「好記得喺臨做手術之前嗰一日，全間舊公司嘅同事圍住我瞓喺醫院嘅嗰張床度，仲問『開唔開show好呢？』嗰陣我即刻話『梗係開！我冇事嘅，放心啦！』但其實我係驚到爆炸。」腳傷需要時間休養，完全康復後才能排練，加上進入寰亞前那段「年度歌手」的時間（指一年只出一首單曲），因此當時在歌單上需要加入不少翻唱歌，在舞台演繹上也未有重大突破：「嗰次最刺激緊張嘅，已經係最基本嘅一樣嘢：我郁唔郁到。」
歌單以自己作品為主
其中一個希望在4年前個唱做得更好的地方，Joyce說起一開始約17分鐘的快歌medley，她直言這個部份做得不好：「回望返，我覺得有少少為咗將一件事好似好唱時間咁而令佢好長時間。其實嗰一部份嘅17分鐘入面，我淨係唱咗一首自己歌《你瘦夠了嗎？》啫嘛，其他時間都係選擇一啲香港嘅經典快歌。我會覺得呢個係冇咁似屬於我演唱會嘅嘢。」因為準備時間不足，Joyce也沒有練習特別技能在台上表演，不過今次則預告會為樂迷帶來驚喜。
Chill Club頒獎禮炸爆舞台為個唱預熱
從三面台到四面台，Joyce雖然先後在擔任許廷鏗、張敬軒演唱會等嘉賓時體驗過紅館四面台，最近在Chill Club頒獎禮上跳唱也是四面台，但她依舊感到非常擔憂：「我係零方向感，我都會同自己講，自己上過四面台嘅經驗都好少有跳唱部份，大多數時間都係乖乖女咁企喺中間度唱，或者兜一個圈唱一首慢歌，咁冇乜難度啦，認得個panel咪得。但係我成日覺得加埋跳唱係會難啲嘅，好彩我哋之前喺Chill Club頒獎禮已經有一個熱身嘅，細型少少嘅四面台，有唱有跳，都可以應付到，但嗰個只係一首歌。」她坦言回到紅館，即使之有熱身機會，仍會有一定跳唱上的難度，於是決定把居所化身排舞室：「之前準備Chill Club頒獎禮嗰表演嘅時候都有用，當我自己練嘅時候，我會將間屋嘅不同物件當做panel，如果每次位置唔同，我嘅舞步都係正確嘅話，咁就應該冇事嘅。」
「Between Us」的兩種解釋
今次重返紅館，演唱會以「Between Us」命名，Joyce在訪問中也以不同角度拆解個唱主題。其中一個說法可從音樂風格談起：「我發覺尤其呢幾年，的確係多咗好多跳舞歌。我一係喺快歌入面展示到霸氣，懶係女王咁嘅感覺；一係就走另一個極端，可能係一啲抒情慢歌。我好想大膽啲探索呢兩個極端之中，中間嘅嗰一個自己，亦係我喺呢兩個極端裏面嘅『Between Us』。」當然，Joyce也清楚要成為一個全能歌手，最好當然是充分掌握兩個極端的自己，向樂迷展示不同面向。
學習用音樂講八卦
當然最直接的解讀，就是Joyce本人與觀眾之間的連繫。Joyce希望透過音樂向觀眾分享自己的想法、秘密，從2008年參演無綫電視劇《畢打自己人》開始，入行已有14年的Joyce離不開外界對自己私事的討論。她坦言過去一直不願在工作以外的事情上分享更多：「只要一提及其他方面嘅話題，我嘅回應通常係『我冇回應，多謝關心』，但係我發現自己個心入面一直有一個雪球不停滾大，已經愈滾愈大。我成日都講，作為一個歌手、舞台上嘅表演者，曲不離口、舞不離手，因為絕不鬆懈，我要繼續努力去進步，學多啲嘢，更上一層樓。呢個只係事業上，但係作為一個人，我都希望唔好原地踏步，可以繼續成長，所以我覺得係要處理呢個雪球。但係某啲話題，唔好話公開地對住大家、對住cam講，有時對住朋友，甚至自己，都好難分享、承認，會覺得好尷尬，好難為情，好肉酸。依家搵到一個缺口，就係透過音樂，唔知點解某啲話題用歌包裝咗之後就可以講出嚟，同大家分享到，咁有咩好得過可以用音樂同大家分享自己故事、秘密？」
「歌手」與「藝人」
「其實我自己一路都好耿耿於懷，就係『歌手鄭欣宜』，唔知點解大家寫我都係『藝人鄭欣宜』。」今年贏得叱咤歌后一刻，Joyce道出入行14年來的心底話，對於「歌手」、「藝人」兩個稱呼的執著，她坦言：「我記得一開始拍劇嗰兩、三年，每一日放工，我就會對住電腦睇其他歌手嘅現場表演。我會緊張到踎喺張凳上面，好似準備捐入個mon度。我好記得有一次我指住個mon，同我朋友講『Why am I not doing that?』（點解我唔係做緊呢一樣嘢？）我諗係嗰段時間開始想被稱為『歌手』，好想被認同係一位歌手，有一種感覺係好想證明畀自己睇，我可以憑自己嘅努力做自己鍾意做嘅嘢。」
成功背後，幕後團隊的付出也不能忽視，Joyce認為努力鍛煉自己實力，才是外界開始稱自己為「歌手」的關鍵：「我覺得每個成功嘅藝人都係天時地利人和，而『人和』一定喺度，但係我從來都唔想靠任何人創造屬於自己嘅一片天，到最後一定要靠自己嘅努力同實力做所有嘢，所以我會好介意大家會覺得我係藝人定歌手，如果想大家叫我做『歌手』，就代表我嘅唱功、表演一定要非常好。係好感動嘅，《叱咤》之後見到好多貼文、報道真係開始寫我係『香港女歌手』，我覺得呢個係最大嘅認同。」
曾大膽用事業作賭注
不論是2005年的「死亡之吻」事件，還是出道初期針對身材、樣貌的抨擊，甚至自組公司期間的「年度歌手」階段，Joyce的演藝事業絕非一帆風順，也曾經想過退出娛樂圈：「我喺18年嘅時候同自己玩咗個好愚蠢嘅遊戲。」她坦言自己在2017-19年狀態極差，恰巧2018年憑電影《29+1》獲得金像獎最佳女配角提名，臨近頒獎一刻，她突然對上天下一個足以影響事業的賭注：「天呀，不如我哋玩個遊戲吖，如果我得到呢個獎，我就劈炮唔撈，離開香港；如果我得唔到呢個獎，咁就表示你想我繼續喺呢個娛樂圈，即係話我仲有嘢未做完，咁我就留低，全力all in繼續試。」當年最屆女配角的對手包括葉德嫻、邵音音、寶珮如和內地演員吳彥姝，位位都是實力派演員，Joyce笑言明知得獎機會不大才敢下賭注。
因家人萌生退意
針對自己的批評和攻擊，雖然Joyce選擇避開回應工作以外的話題，讓時間證明一切，但她坦言等待過程並不容易。除了漫長的等待和付出，令Joyce萌生退意的還有遠在加拿大的家人：「我屋企人嘅年紀愈來愈大，而佢哋全部都喺加拿大。其實最初我決定留喺香港，佢哋係反對嘅，因為嗰陣我年紀細，佢哋好想我返加拿大。即使最後佢哋依家支持我，但係我一直以來都有個疑問：究竟選擇留喺香港追所謂嘅歌手夢係咪叫曳呢？但係今年都35歲啦，都做咗大人好多年，我諗係乖掛。我絕對係唔聽話嘅人，但我絕對係一個乖嘅人。」
避公開談私事：好尷尬
談起Joyce，外界少不免會提及媽媽沈殿霞（肥姐），今年在樂壇大豐收，網民都會說著「肥姐在天之靈會感到高興」，關於一些正面評價，Joyce也會感到舒服：「呢一句係會令我非常開心，好驚喜，我諗作為兒女，大家都會想父母可以安心，可以為我哋驕傲。」不過媒體最近則經常談起她年屆35歲，可以動用肥姐的6000萬遺產，她也拒絕回應。Joyce坦言：「有好多嘢好難喺一個大概45分鐘嘅訪問可以講得晒，畢竟我用咗十幾年避開某一啲話題，呢啲話題都唔值得講，（It’s not tastable to talk about certain things），會覺得講到呢啲話題好尷尬。不過無論發生咩事都好，都唔會影響到我對唱歌同喺舞台表演嘅熱情，所以我唔想喺嗰啲位度畀力量。」
自覺唔算最勤力
頒獎禮上屢獲佳績，目前離贏得女歌手大滿貫只差一步，Joyce在年初收到不少樂迷打氣、祝賀，讚她過去一年很勤力。不過Joyce並不認同：「我唔覺得我係比別人更努力，其實當疫情係咁嘅時候，我哋全行唯一可以做嘅就係努力啦，係咪先？我反而覺得係觀眾近呢十幾年，因為我嘅事業有好多高高低低，佢哋不離不棄，就算唔係我fans都會選擇用佢哋嘅時間同心機望返我，聽返我。係你哋將你哋嘅注意力畀咗我，我先有機會讓大家重新認識我嘅音樂，對我有一個支持嘅心，開始鍾意我嘅音樂，開始鍾意我份人，今次有機會喺呢個演唱會答謝大家。我呢啲死中女最鍾意聽八卦，今次就透過音樂同你哋講八卦，哈哈。」