古巨基欽點BeatBox高手　音樂人Ink：愛音樂但唔愛娛樂圈

約十年前，古巨基的《年年有今日》，除了找上側田﹑小肥﹑方力申和Rubberband的六號等歌手客串協奏外，更找來Beatbox手Ink伴奏，Ink因而將Beatbox帶上紅館，可說是香港第一人。
攝影：梁碧玲

Ink因為玩Beatbox而被人認識，與其說他技巧高超，倒不如說他早開始玩BeatBox。因為千禧年互聯網還未絕對成熟，要找到網上片段教BeatBox相當困難，但Ink因為興趣，而與朋友在維園玩這些HipHop音樂。「10年前在維園定期搞音樂分享交流，純粹自己享受，認識了一些朋友。其中有人識雷頌德，當時他是古巨基的演唱會監製，需要一Part 玩Acapella，於是聯絡了我。」

因為古巨基演唱會，Ink可以在紅館Solo5分鐘，走勻四面台，成為紅館第一人，但他沒有因而加入樂壇，「我到今日都唔覺自己屬於呢個圈，身份好奇怪，我都唔覺自己屬於HipHop，我鍾意HipHop，但唔只鍾意這種類。有人渴望頒獎禮，但我一路都唔特別鍾意。」

雖然不追求獎項，但他已經奪得四大媒體中，唯一的獎項《新城國語力Beatbox歌手》，不過《國語力頒獎禮》已經成為歷史，這個獎項，又成為了史上唯一一人。儘管有主流樂壇的肯定，但他卻從不認為自己是歌手，他說：「其實我好怕介紹自己，我會睇佢想聽什麼，如果搵我想做Beatbox，我會叫自己做Beatboxer，如果要界定，可能我算係Multimedia多些，其實呢個世代咩都要識。」

「我唔想自己身份是用來推廣Beatbox，只不過是我識，而它又可以幫我做音樂。」

「我愛音樂，但加入呢個圈，是兩回事。」

有人因為想大紅大紫，被人迷戀而成為歌手，但他的理由相當單純。「我試過去電視台做音樂節目，有些人舉牌等你，我試過同其中一個講，不如唔好舉牌啦，我覺得舉牌唔好睇！我想你黎聽歌，唔係想你舉牌，我拿住個袋睇騷都唔舒服啦！所以我唔特別享受娛樂圈。我會專注做音樂多過加入大家認為的娛樂圈。」

要在「娛樂圈」生存，其實要好勤力。「所謂的歌手，入Studio時間唔多，但要去生日派對，因為有記者，總之好忙，又要做其他嘢。有些人做左好多這些事，兩三年後都消失了。我就諗，我自己玩既嘢更加唔正常，我又覺得，我係咪需要咁做呢？」

在香港，BeatBox和HipHop都是很邊緣的東西，只有少數舞台容納到這些音樂，香港樂壇的Rapper和Beatbox歌手幾乎一隻手都數得完，但其他國家的樂壇並不是這樣。面對如此困境，Ink仍然堅持：「如果想搵錢去炒樓啦，做音樂唔好諗置富，你會冇個心去做。做音樂表演，一場騷可以等於打工仔一個月人工，但唔好玩丫麻！ 你會照做，但唔會享受那些音樂，如果做音樂只想著搵錢，會有好多樂趣失去了。」

既然不想迎合主流，唯有做回小眾。最後，他說：「本來我接觸的東西已經不是大眾，而吸引我的地方就是他不大眾，我唔係適合做大眾化的人。」