林二汶演唱會︱拖實姜濤引全場尖叫 ：中女歌手博小鮮肉懵！
林二汶今晚（27/3）在紅館舉行《The Beginning of Faith Live》演唱會頭場，除了《初音》、《守破離》等自己的作品外，亦翻唱了《下一站天后》、《給十年後的我》。
A組畢業歌《True Colors》唱到喊
唱到《搖到外婆橋》時，二汶憶起婆婆離世之時，剛好收到紅館檔期落實的消息：「我最後同婆婆講『你個孫真係開到紅館啦，佢好叻呀，你唔使擔心啦。』我忽然明白點解無啦啦褲袋入面有張紙巾，《搖到外婆橋》送畀喺天上面嘅婆婆。其實面對生離死別，無論你做得幾好，你都唔會準備好，你永遠唔會準備好。」及後唱起盧凱彤（Ellen）的《大拇指之歌》，期間一度哽咽甩嘴，其後唱《True Colors》時，二汶加插一段《See You Again》的副歌，途中更忍不住流淚。
二汶將《True Colors》獻給場邊的《全民造星III》A組學員，指這不但是他們在比賽的畢業歌，亦是屬於自己的畢業歌。及後趙祥誠（Ben）擔任嘉賓，除了與二汶合唱一曲《People Like Us》外，更表演招牌「折骨舞」，瞬間將氣氛推上高峰，其後再與二汶合唱《超友誼》。全場隨即站起來舞動，更玩起燈浪。不過數到全場最受歡迎的歌曲，非電影院禮儀歌莫屬，當中二汶唱起《戲院禮儀歌》「唔該熄咗你個電話啦，我哋而家係嚟睇演唱會㗎」後，即吸引全場觀眾大合唱。
姜濤驚喜現身全場尖叫
二汶在唱完Don Don Donki主題曲《Miracle Shopping》後，姜濤突然以嘉賓身份驚喜亮相，博得全場觀眾尖叫歡呼。此時，二汶拖實姜濤並笑說：「呢啲就係中女歌手嘅福利，博呢啲小鮮肉嘅懵，你睇下台下面啲姐姐幾羨慕我！」她亦笑言，自己跟姜濤出道相差20年，今次能夠同台演出，非常特別，「如果我有少少遠見，我係生得佢出！但係我選擇咗入行，冇生仔，所以我冇做到佢媽媽。不過我哋相隔兩個十年，但係喺同一個時間攞到一個大家送畀我哋嘅獎，好多謝你哋。」
點擊下圖觀看二汶拖實姜濤情況：
二汶又談起二人日前綵排的趣事，當時姜濤問二汶會否覺得緊張，又問對方人生中最喜歡哪首歌。她說：「忽然間畀佢問到人生，我都唔知點答，我就話好多歌都鍾意，好難揀，姜B就話『係㗎，真係好多隻歌都鍾意』。」姜濤站在紅館四面台，顯得非常緊張，他感謝二汶邀請，又稱讚對方漂亮。二人其後合唱張學友與王菲的經典快歌《非常夏日》。
Encore憶起兩年前低潮
在Encore部份，二汶收到Fans贈花，她笑指：「我瞬間覺得自己有黎明嘅感覺！多謝晒，畀我有種做我最喜愛男歌手嘅感覺！」其後二汶唱出《無忘花》、《愛情是一種法國甜品》和《最後的信仰》，期間甚少談起自己私事的她，談起兩年前Ellen離世後的低潮期：「兩年前我經歷咗一個根本無辦法形容有幾低沉嘅時間，一個好大好大嘅跌倒，嗰陣時會覺得，我諗我冇啦，我瞓唔到覺，要食鎮靜劑，不過係好短嘅時間。之後喺最壞嘅時候遇到喺信仰認識嘅一班人。」她在兩年前遇上道家師傅及同門師兄弟姊妹，在逐一介紹後，更介紹自己的道號為「玄晞」。在結束前，二汶回到後台，熒光幕上顯示《The Best Is Yet To Come》歌詞，全場跟著音樂大合唱，演唱會在11時結束。