TVB記招惡搞姜濤　花姐稱毋須道歉：好開心隔籬台留意我哋動態

無綫（TVB）日前舉行「超級綜藝 隆重登場」記者會，當中鄧智堅以「薑蓉」身份惡搞男團MIRROR成員姜濤，惹來一眾「姜糖」不滿，事後馮盈盈、林盛斌（Bob）等藝人公開道歉。

經理人花姐（黃慧君）今日（27/3）現身MIRROR演唱會記招現場，她接受《香港01》訪問時指，自己沒有認真看過整段演出，但認為一眾藝人毋須就事件致歉：「其實未去到要道歉嘅，我諗每一個藝人出嚟扮嘢又好，或者做各類型嘅表演都好，其實都係想娛樂觀眾啫。可能佢哋會覺得『你扮得姜濤唔好睇』，但係我哋應該尊重每個藝人嘅表演。」

談到當中的對白，花姐認為純屬搞笑，亦指姜濤沒有為這件事感到不高興：「姜濤同我睇完都喺度笑，唔會嬲囉，因為大家都知呢啲嘢都係講笑啫，唔需要咁認真。反而我好開心，我哋留意隔籬台嘅動態，隔籬台都會留意我哋嘅動態，咁唔係更加好咩？」花姐又希望一眾「姜糖」不要太緊張，相信友台前輩都會愛錫姜濤，不需要將這件事看得太重。

點擊圖輯，睇睇姜濤記招靚相：