RubberBand「呢度」開騷全場熱爆 Mr.五子到齊撐場
本地樂隊RubberBand在麥花臣場館舉行一連三場「呢度」演唱會，今晚來到尾場，在台下見識到「Band友撐Band友」的熱誠，現身支持的有樂隊Dear Jane、填詞人黃偉文、RubberBand舊唱片公司同事小肥（徐智勇），最令人驚訝的，是連一直新聞多多的Mr.也full team出席，包括主音Alan在內五名成員齊齊來撐場。而現場更有不少忠實歌迷買了企位，紛紛湧到台前，情緒高漲。
攝影：符祥定
在演唱會開始不久，主音6號唱完《倒行詩》，講到今次音樂會別具意義，「雖然今次係第5次開音樂會，但以獨立樂隊身份搞，真係第一次，好多謝大家見證住呢一刻。」其後唱到新歌《飛天》，其中有句歌詞「Brand New Day」，6號想以此帶出正能量：「我們獨立之後，每日都係Brand New Day，希望大家遇到任何困難，都可以Brand New Day，帶着這種精神。」
此外，今晚有方皓玟做嘉賓，合唱《終於好天氣》，6號表示不論順境或逆境，聽這首歌都好適合，同時將這首歌送給一位攝影師朋友，因這位朋友患癌，但仍堅持下去，希望他可以繼續撐下去。
6號老婆上台合唱掀高潮
中段，Rubberband唱到興起，就走落觀眾企位，笑言好似大學Ocamp營火會，觀眾坐定定聽歌。當中鼓手泥鯭拿起結他自彈自唱《怪物》，唱前更當眾向女友示愛：「本來為了音樂會，整個頭（新髮型）想給她個驚喜，誰知她出現在後台，反而給了我驚喜。我於呢度，想同你講，我愛你呀！」語畢，現場拍爛手掌。
其後來到閃爆全場的環節，就是6號太太Tim Lui上台獻唱《Slow & Easy》，兩人深情對唱之外，6號更拖實太太到台邊非常sweet，同時大家才發覺Tim Lui都幾唱得！6號就話：「同太太唱歌，重拾好多回憶，包括之前大學一齊參加歌唱比賽的回憶，好開心！」令全場觀眾聽到，都覺得好閃同好甜蜜，真是一場既熱血又動人的演唱會。