【我不怕唱歌】惡搞王原來好唱得 王祖藍：把聲好溫柔
《我不怕唱歌》終於有首位男聲，與他同樣走搞笑路線的王祖藍拿着電話，聽了幾秒就認得他的聲音，「好溫柔啊把聲，估唔到除咗搞笑一面，仲有咁深情嘅歌聲。」不過，祖藍再聽了幾秒，續說，「唔好預賣到碟...」媽啊，好亂啊，到底係好聽定唔好聽？
他曾於美國修讀戲劇，畢業後回港發展，參加大台鬥靚節目入行，而不為人知的是，他曾經做過DJ，又參加過新秀歌唱比賽，入行五年做過千千萬萬個角色，不過多數是「路人甲」，認得他的樣子，但未必叫得出名字，直至近期他靈機一觸揮下「神來之筆」惡搞網絡神曲，令大眾重新認識他。
「曾經在紐約做過兩個月DJ，有主持清淡節目同音樂節目，但做得唔長，因為當時合約問題，而且，我好想返香港參加新秀比賽。」參加比賽無疑是香港娛樂圏其中一個最直接的入行方法，無論是電視台的選美節目、唱片公司的選秀比賽，夠話題性的話，未入行就已經可以令人記得你。
搞笑天分亦令他在新秀中相當突出，之不過，要評判記得你方法有二，一是你的實力非常極端（太好或太差），二是你實在太與別不同，「我喺美國學親都係Opera個啲，流行曲個啲聲我就唔識嘅，唔啱個市場，我記得我揀咗梁漢文個首《斷了氣》，唱到『斷了氣』啊真係，嗰首歌好dramatics嘅，個時我用咗好多舞台嘢出嚟唱，吳雨大哥、Mani（霍汶希）都有睇，去參加比賽會mark個星星位你企，我特登企到去貼牆，大哥仲叫我過嚟。」
最後，他的表演又伸手、又轉身，跳舞唱歌樣樣齊，大概評判對他印象很深刻，但公眾就毫無記憶，因為他在50強已經止步，「當時大哥嘅表情都有少少似係『吖，依個o靚仔想點呢？』，當年我26歲，台下嘅人都話我好有預備，我滿懷歡喜返屋企等電話，但最後等極都冇，我仲記得係邊屆，就係06年洪卓立嗰屆。」
再接再厲 捲土重來
即使因為新秀有個稍為崩潰的經歷，自認「機會主義者」的他未有放棄，待在香港話劇團3年後，他又再接再厲，今次更雙管齊下，一次過報了《香港先生》和《超級巨星3》兩個比賽，「因為好想做影視工作，所以就淨係參加咗依個，個時都有報《超級巨星3》，但因為個時港男入咗圍，巨聲再打嚟叫我面試，咁我就話已經參加咗你哋另一個比賽喇！」
港男的舞台同時亦滿足了他兩個願望，因為才藝表演的部分，他表演了自己非常熱愛的唱歌，「當時都唱了今次專訪唱嘅《為你祝願》，我仲度咗個分半鐘演出，有Rap、彈琴、扮鬼扮馬，咩都出齊㗎喇，好用心準備。」
到底有幾用心準備，同年選港姐的麥美恩（Mayanne）就為他的實力作證，Mayanne在估歌仔時，在短短30秒就認得他，「已經唔係第一次聽佢唱歌，我係11年港姐，決賽我都係喺現埸，佢唱個時我有份聽，認得佢聲底，唱得好Soft，同平時講嘢有啲唔同，依期佢成日唱《PPAP》，你唱多啲深情嘢吖嘛，黃建東！」
問到Derek在二選一的掙扎中，為何棄巨聲選了港男？他想了想說到，「我鍾意唱歌，但我知我唱功未勁到一唱就攞硬冠軍，我唔係個啲級數我自己知，港男係挑戰嚟嘅，參加都掙扎咗好耐，不嬲冇諗住要Show身材同埋着住三角褲喺電視上面出現。」
雖然選港男令Derek進入夢寐以求的影視行業，但他亦坦言加入TVB後，長期拍劇做行行企企的角色的確有心灰意冷的時間，「但我從來都冇諗過要放棄，因為太鐘意做依行，反而好多人叫我做吓Part-time、搞吓自己生意、做吓保險，但我都冇做，因為唔想影響係TVB嘅工作，當然都掙扎過，會覺得點解冇人見到我想搞笑呢？」
而惡搞《PPAP》後，Derek終於朝着搞笑戲路走近一步，「片出左之後有個導演開戲，由徐天佑做主角，要搵個中學同學叫肥波，睇完我段片就搵左我喇，我做肥仔角色都OK，最開心係畀人見到我鍾意做喜劇，搞笑的一面。」
「我鍾意唱歌，但我知我唱功未勁到一唱就攞硬冠軍，我唔係個啲級數我自己知。」
問到Derek比較想在音樂還是演戲上發展？他自言一直都比較貪心，想兩樣野都要，不過又會因為樣樣都想要已無法專注做好其中一樣，「結果可能會周身刀冇張利，好多人叫我喺TVB畀心機啲做戲，好似倒一杯水，你滿咗就會流出嚟喇，就唔會每杯得啲啲，森美同Bob佢哋就係電台出色，再去發展電視電影。」
回到文章的開始，祖藍到底為何狠心叫Derek「唔好預賣到碟」？其實不是祖藍黑心，只是他深明全世界的大趨勢已不再專注於唱片，反而鼓勵Derek，「如果有佢做吓網絡歌手都可以諗吓，有乜就做乜喇，唔好放過任何機會，依家唔夠食㗎嗎，除左惡搞《PPAP》仲有好多嘢可以做㗎！」
愛人結婚了 新郎不是我
在專訪中還有一個小插曲，拍攝中所唱的《為你祝願》，是由Derek親自創作，亦是當年參選港男時表演的歌。Derek直言其實這是一首有故事的歌，當年Derek曾經與一個女生情頭意合，而且相當曖昧，但因為他要到外國升學，所以到最後都沒有成為戀人，後來那個女生和其他人相戀結婚，Derek去完其婚禮後有感而發寫了這首歌。
「我係美國時都同佢曖昧咗兩年，佢都等咗我兩年，但唔想耽誤到對方，因為我當初冇打算返嚟香港發展，一直遠距戀好唔負責任，我又係一個好追隨理想嘅人，咁為咗理想，有時有啲嘢係要放棄嘅。」Derek無奈地說。
攝影：潘思穎
髮型：Deep Yu @Beijing Hair Culture
化妝：Alfred @Seven sense
服裝：HALFBEAT