古天樂《男朋友》EP賣過白金 吳雨：比起Eason千嬅一般般啦
話說早幾個月前，古天樂拍住古巨基翻唱《當年情》，「雙古」金口一開就勾起不少網民的回憶，其實十幾年前古天樂係出過唱片㗎！（記者知道這個並不是新聞）然後《男朋友》、《像我這一種男人》、《今期流行》……就再次成為大家茶餘飯後的話題，更有網民興起講，既然「今期流行…開演唱會」，最想可以踩上紅館的歌手就是古天樂，連海報都做埋畀古仔，時、地、票價樣樣齊，相當有心。今日想同大家分享的，當然不只是這些，想說的事，其實這位期待古仔上紅館的網民的確是獨具慧眼。
曾幾何時，古仔做過華星唱片旗下歌手，（華星啊，即係簽過梅艷芳、張國榮、羅文、甄妮、同埋「華星三寶」嗰間華星啊！）當時，縱橫娛樂圈逾40年的吳雨大哥是華星的總經理，一手培育了「華星三寶」陳奕迅、楊千嬅及梁漢文，近日吳雨宣布退休，商台的《1圈圈 星光背後》就邀請了他上電台接受訪問。
成功為古仔出碟 吳雨話「最自豪」
吳雨接受訪問時，被問到在華星時代創下「奇蹟」，講到奇蹟當然想起今時今日已是天王的陳奕迅啦，錯錯錯，其實「奇蹟」是為古仔出碟！談到古仔時，吳雨頗為自豪說：「依個都唔係一個奇蹟，我認為係幾啱嘅決定，當時古仔未係最紅嘅時候，佢錄咗一隻歌（《男朋友》？），比較起陳奕迅同楊千嬅係一般般啦，但個人而言已經好好。」
對於古仔的歌喉，吳雨似乎相當有信心，其後古仔再錄了幾首歌，但全都被存放在倉底，未有製作成唱片發市，見一直都沒什麼聲氣，連古仔都忍不住追問吳雨，到底幾時可以出碟呢，惟吳雨堅持覺得未到適當的時機，讓古仔繼續靜心等待。
結果皇天不負有心人，在2000年，古仔憑《創世紀II天地有情》爆紅（但吳雨在訪問中說錯了是《尋秦記》，後來經主持人提醒，該為《創世紀》），吳雨亦覺得是時候了，決定扑槌為古仔推出第一張唱片《男朋友》（2000）可以面世：「嗰時古仔得3首歌，3隻歌咪夠，（夠出EP！）咪係！（最終銷量幾多？）有五萬幾六萬！」而同年推出的《今期流行》亦有幾萬銷量，提起古仔昔日在樂壇輝煌的成績，吳雨自信的說：「有時真係講Timing㗎！」
講返嗰位期待古仔上紅館的網民，到底他有眼光到什麼程度呢？按吳雨所說，當年《男朋友》賣到「五萬幾六萬」，亦即是白金唱片的成績（在2006年1月1日之前，本地流行唱片的金唱片及白金唱片的要求銷量分別定為25,000張及50,000張），而《今期流行》亦是金唱片，不要忘記當年的標準比現在高很多，所以古仔是一個名副其實的「白金唱片歌手」。數數手指，一個紅館可以坐12500人，如果當日買唱片的人都到場支持，古仔可以開四場有突！
嚟，喺古仔紅館未入到紙前，大家聽住《男朋友》MV版先：